जळगाव मिरर | १२ डिसेंबर २०२३
राज्यातील खान्देशात गेल्या काही वर्षापासून अनेक ग्रामीण भागात बिबट्याची दहशत दिसून येत आहे. काही ठिकाणी जनावरांचा देखील फडशा या बिबट्यांनी पाडला आहे. पण सध्या नंदुरबार जिल्ह्यातील शहादा शहरातील मध्यवस्तीत असलेल्या आदित्य हॉस्पिटलमध्ये बिबट्याने प्रवेश केल्याने परिसरात मोठी खळबळ उडाली आहे. याबाबत वनविभागाला कळविण्यात आल्यानंतर पथक रुग्णालयात दाखल होत पिंजरा लावण्यात आला होता. चार तासानंतर अखेर बिबट्याला पकडण्यात वन विभागाच्या पथकाला यश मिळाले.
मिळालेल्या माहितीनुसार, शहादा शहरातील आदित्य हॉस्पिटलमध्ये अचानक बिबट्या शिरला होता. बिबट्या आल्याने रुग्णालयात असलेले रुग्ण व त्यांच्या नातेवाईकांमध्ये एकच खळबळ माजली होती. शिवाय रुग्णालयात बिबट्या शिरल्याची माहिती शहादा शहरातील नागरिकांना जशी कळाली तशी रुग्णालया बाहेर नागरिकांनी मोठी गर्दी केली होती. वनविभाग आणि पोलीस दलाच्यावतीने नागरिकांना रुग्णालयापासून दूर करत बिबट्याला पकडण्यासाठी सापडा टाकला होता.
वनविभागाने बिबट्याला जेरबंद जाण्यासाठी पिंजरा लावला होता. त्याला हटकत पकडण्याचा प्रयत्न सुरु झाले. मात्र बिबट्या पकडण्यात यश मिळत नव्हते, अखेर चार तासानंतर बिबट्या पिंजऱ्यात अडकला. बिबट्या पिंजऱ्यात बंद झाल्यानंतर वनविभागाने सुटकेचा निश्वास सोडला. बिबट्याचा शहरी भागातील वावर हा चिंतेचा विषय बनला आहे.
