जळगाव मिरर | २८ मार्च २०२४
शहरातील प्रादेशिक परिवहन कार्यालयाजवळ भरधाव आयशर गाडीने ट्रॅक्टरला मागून जोरदार धडक दिली. या अपघातात दोन्ही वाहनांवरील चालक जखमी झाले असून वाहनांचेही नुकसान झाले आहे. ही घटना बुधवारी सकाळच्या सुमारास घडली. अपघातग्रस्त वाहने रामानंदनगर पोलिसांनी ताब्यात घेतली आहेत. मात्र, तक्रार नसल्यामुळे पोलिसात कुठलीही नोंद नाही.
मिळालेल्या माहितीनुसार, शहरातील उपप्रादेशीक परिवहन कार्यालयाजवळून (एमएच. ४३.एडी.५७०७) क्रमांकाची आयशर गाडी बुधवारी सकाळच्या सुमारास जात होती. अचानक या गाडीने पुढे चालणाऱ्या ट्रॅक्टरला धडक दिली. धडक ऐवढी जबर होती की आशरच्या एका बाजूचा पुढील भाग अक्षरशः चक्काचूर झाला होता. तर चालकाच्या पायाला गंभीर दुखापत झाली. दुसरीकडे ट्रॅक्टर चालकाला सुध्दा दुखापत झाली. अपघातानंतर घटनास्थळी नागरिकांनी प्रचंड गर्दी झाली होती. घटनेची माहिती मिळाल्यानंतर रामानंदनगर पोलिसांनी सुध्दा घटनास्थळी धाव घेवून अपघातग्रस्त वाहने ताब्यात घेतली. नंतर जखमींना उपचारार्थ रूग्णालयात हलविले. मात्र, या अपघातप्रकरणी कुठलीही तक्रार नसल्यामुळे पोलिसात नोंद नाही.
