जळगाव मिरर | ७ जून २०२४
लोकसभा निवडणुकीचा निकाल हाती आला असून आता राष्ट्रीय लोकशाही आघाडीच्या संसदीय पक्षाच्या बैठकीला उपस्थित राहण्यासाठी पंतप्रधान नरेंद्र मोदी जुन्या संसदेच्या (संविधान सदन) सेंट्रल हॉलमध्ये पोहोचले आहेत. भाजपा नेते नरेंद्र मोदींची संसदीय पक्ष आणि एनडीए नेतेपदी निवड होत असल्याची घोषणा आज (दि.७ जून)पक्षाचे राष्ट्रीय अध्यक्ष जे.पी नड्डा यांनी केली. यावेळी नरेंद्र मोदींच्या प्रयत्नांमुळेच विकास झाल्याचे नड्डा म्हणाले. सत्तास्थापनेपूर्वी नवनिर्वाचित खासदार आणि एनडीए पक्षातील नेत्यांची बैठक जुनी संसद भवनच्या संसदेच्या सेट्रल हॉलमध्ये सुरू आहे.
आपल्या सर्वांसाठी हा एक ऐतिहासिक क्षण आहे आणि आपण श्री नरेंद्र मोदी यांची सलग तिसऱ्यांदा NDA चे नेते म्हणून निवड करणार आहोत. आज आपण सर्वजण या ऐतिहासिक क्षणाचे प्रत्यक्षदर्शी आहोत. हे आपल्या सर्वांचे भाग्य आहे, असेही याप्रसंगी बोलताना जे.पी नड्डा म्हणाले.
मंत्रिमंडळातील त्यांचे (श्री नरेंद्र मोदीजी) सहकारी या नात्याने केवळ मीच नाही तर सर्व देशवासीयांनी मोदीजींची कार्यक्षमता, कार्यक्षमता, दूरदृष्टी आणि सत्यता प्रत्यक्ष पाहिली आहे. पुढील ५ वर्षे नरेंद्र मोदी यांनी नेतृत्त्व कारावं ही देशातील जनतेची इच्छा आहे. असे म्हणत राजनाथ सिंह यांनी संसदीय पक्ष आणि एनडीए नेतेपदासाठी नरेंद्र मोदी यांच्या नावाचा प्रस्ताव मांडला.
राजनाथ सिंह यांच्या प्रस्तावाला अमित शहा आणि नितीन गडकरी या दोघांनीही अनुमोदन दिले आहे. तसेच “मोदींच्या नेतृत्त्वात देश विश्वगुरू बनेल” असे म्हणत टीडीपीचे चंद्राबाबू नायडू यांनी देखील राजनाथ सिंह यांच्या प्रस्तावाला अनुमोदन दिले. यासोबतच बिहारचे मुख्यमंत्री नितीश कुमार, महाराष्ट्राचे मुख्यमंत्री एकनाथ शिंदे आणि उपमुख्यमंत्री अजित पवार, लोक जनशक्ती पार्टीचे प्रमुख चिराग पासवान, हिंदुस्थानी आवाम मोर्चाचे प्रमुख जीतनराम मांझी, अपना दल किंवा अपना दल (सोनीलाल) च्या अनुप्रिया पटेल यांनी देखील नरेंद्र मोदी यांच्या नावाला सहमती दर्शवली.
जे.पी.नड्डा, राजनाथ सिंह आणि नितीन गडकरी यांच्या सभांमुळे लोकांच्या मनात विश्वास निर्माण झाला. मोदींच्या नेतृत्त्वात आज देश अव्वल स्थानी आहे. जागतिक स्तरावर भारताचा गौरव करण्याचे संपूर्ण श्रेय मी नरेंद्र मोदी यांना देतो. त्यांच्या नेतृत्वाखाली आम्ही जगातील पाचव्या क्रमांकाच्या अर्थव्यवस्थेत पोहोचलो आहोत , ते विकसित भारत व्हिजन 2047 ची योजना आखत आहेत, असे म्हणत टीडीपीचे प्रमुख चंद्राबाबू नायडू यांनी नरेंद्र मोदी यांच्या संसदीय पक्ष एनडीए नेतेपदाच्या नावाच्या प्रस्तावाला अनुमोदन दिले.
9 जून रोजी संध्याकाळी 6 वाजता राष्ट्रपती भवनात मोदी तिसऱ्यांदा पंतप्रधानपदाची शपथ घेऊ शकतात. मोदींसोबत संपूर्ण मंत्रिमंडळ शपथ घेऊ शकते, अशी बातमी आहे. एनडीएची पहिली बैठक ५ जून रोजी दुपारी ४ वाजता पंतप्रधानांच्या निवासस्थानी झाली. एक तास चाललेल्या या बैठकीत 16 पक्षांचे 21 नेते उपस्थित होते. सर्वांनी मोदींना एनडीएचे नेते म्हणून निवडले होते. मात्र आज होणाऱ्या संसदीय पक्षाच्या बैठकीत मोदींची अधिकृतपणे एनडीएच्या नेतेपदी निवड झाली.
