जळगाव मिरर | २१ जून २०२४
राज्यातील अनेक महामार्गावर अपघाताच्या भीषण घटना घडत असतांना नुकतेच नंदुरबारमध्ये एक ट्रक आणि दुचाकीचा भीषण अपघात झाला असून या अपघातात एक महिला जागीच ठार झाली आहे. ही महिला गर्भवती असल्याची माहिती समोर आली आहे. ट्रकने दुचाकीला धडक दिल्यानंतर या महिलेच्या डोक्यावरून ट्रकचे मागचे चाक गेले. त्यानंतर या महिलेचा जागीच मृत्यू झाला आहे.
मिळालेल्या माहितीनुसार, नंदुरबार शहरालगत असलेल्या करण चौफुलीवर बाजारासाठी मोटरसायकलवर जात असलेला दांपत्याला खडी वाहतूक करणाऱ्या ट्रकने जोरदार धडक दिली. यानंतर ही महिला जागीच खाली पडली. त्यानंतर तिच्या डोक्यावरून ट्रकचे चाक गेल्याने तिचा मृत्यू झाला. कवा पाडवी असे मृत महिलेचे नाव आहे. दरम्यान, घटनास्थळी पतीने प्रचंड आक्रोश केला. पतीही किरकोळ जखमी झाले आहेत.
या अपघातानंतर काही मिनिटातच पोलिसांनी घटनास्थळी धाव घेत कारवाई केली आहे. संबंधित ट्रक चालकाला ताब्यात घेण्यात आले आहे. याप्रकरणी आता पुढील तपास सुरू आहे. दरम्यान, करण चौफुली नजीक दररोज लहान-मोठे अपघात होत असतात. या रस्त्यावर मोठ्या प्रमाणात खड्डे असल्याने अपघातांच्या प्रमाणात वाढ झाली आहे. मात्र याप्रकरणी संबंधित विभागाकडून दुर्लक्ष केले जात असल्याचा आरोप होत आहे.
