जळगाव मिरर | ११ ऑगस्ट २०२४
जळगाव जिल्ह्यात गेल्या काही महिन्यापासून मारहाण व खुनाच्या घटना सातत्याने घडत असतांना नुकतेच एरंडोल तालुक्यातील सावदा प्र.चा या गावात एका २५ वर्षीय तरुणाचा मध्यरात्रीच्या सुमारास अनोळखी इसमांनी खुन केल्याची खळबळजनक घटना पहाटेच्या सुमारास उघडकीस आली आहे. घटना पोलिसांना माहिती पडताच पाळधी पोलीस दूरक्षेत्र पोलीस घटनास्थळी पोहचले होते.
मिळालेल्या माहितीनुसार, एरंडोल तालुक्यातील सावदा प्र.चा या गावात दि.१० रोजी मध्यरात्रीच्या सुमारास याच गावातील जुनी भिलाटी येथील रहिवासी इंदल प्रकाश वाघ (वय २५) हा दगड फोडून आपल्या परिवाराचा उदरनिवार्ह करीत असून गेल्या काही दिवसापासून त्याची पत्नी त्याच्या सोबत राहत नसून तो आपल्या परिवारासोबत वास्तव्यास असून दि.१० रोजी रात्री १० वाजेच्या सुमारास घरून बाहेर पडला असता. मध्यरात्री बस स्थानकानजीक रात्री १२ ते पहाटे ४ वाजेच्या दरम्यान काही अनोळखी इसमांनी त्याच्या डोक्यात दगड टाकून खून करण्यात आल्याची धक्कादायक घटना पहाटे ५ वाजेच्या सुमारास उघडकीस आली आहे.
याप्रकरणी पहाटे ५ वाजेच्या सुमारास सावदा गावाचे पोलीस पाटील पवार यांनी याबाबत पोलिसांना माहिती दिली. यावेळी धरणगाव पोलीस निरीक्षक पंकज देसले, प्रभारी एपीआय प्रशांत कंडारे, पोलीस हवालदार वसंत निकम, पोलीस शिपाई प्रदीप सोनवणे, मोहन पाटील यांनी घटनास्थळी धाव घेवून मृतदेह जळगाव जिल्हा सामान्य रुग्णालय येथे हलविण्यात आले होते. शासकीय वैद्यकीय महाविद्यालयाचे सीएमओ निरजन देशमुख यांनी त्याला मयत घोषित केले.
