पाचोरा : प्रतिनिधी
तालुकयातील गाळण बु” ता. पाचोरा येथे २२ वर्षीय विवाहितेने घराच्या छताला दोर आवळुन गळफास घेतल्याने त्यात तिचा मृत्यू झाला. मात्र विवाह झाल्यापासूनच २ लाख रुपयांच्या मागणीसाठी तिचा शारीरिक व मानसिक छळ होत होता. याबाबत नेहमीच मुलगी आई वडिलांकडे सासरच्या मंडळींची तक्रार करत होती. सासरची मंडळी कधी तरी सुधरतील असे सांगुन आम्ही तिला सासरी नांदायला पाठवत होतो. आमची मुलगी आत्महत्या करण्या सारखी नव्हती. मुलीचे निधन झाल्यानंतर घरी असलेले सासरे व नणंद हे पसार झाल्याने तिला अगोदर फाशी दिली व नंतर दोर बांधून छताला लटकविले. यामुळे सासरच्या मंडळींनी तिचा खुन केल्याचा आम्हाला संशय असुन त्यांचेवर खुनाचा गुन्हा दाखल व्हावा अशी मागणी मयत मुलीच्या आई, वडिलांनी पोलिसांकडे केली आहे. घटनेबाबत रात्री उशिरापर्यंत गुन्हा दाखल करण्याचे काम सुरू होते.
धरणगाव तालुक्यातील भवरखेडा येथील सुवर्णा हिचा विवाह गाळण ता. पाचोरा येथील योगेश चुडामण पाटील याचेशी दि. १९ फेब्रुवारी २०२२ रोजी झाला होता. योगेश हा नाशिक येथे कंपनीत नौकरीस असुन त्याचे भावाचे व त्याचे नाशिक येथे दोन मेडिकल असल्याने आपल्या मुलीचा विवाह केला होता. मुलीचे वडिल सुर्यभान सिताराम पाटील यांची परिस्थिती अतिशय बिकट असुन ते दुसऱ्याच्या घरी सालदारकी करतात. व आई अनिता सुर्यभान पाटील ह्या मोल मजुरी करत असतांना मुलगा हा नौकरीला असल्यामुळे त्यांनी कर्ज काढुन विवाहा प्रसंगी ७ लाख रुपये हुंडा कबुल केल्यानंतर त्यापैकी ५ लाख रुपये रोख दिल्यानंतर २ लाख रुपये बाकी असल्याने तिला माहेरहुन २ लाख रुपये आणण्यासाठी सतत शारीरिक व मानसिक त्रास देत असल्याचे सुवर्णा ही माहेरी आल्यानंतर व भ्रमणध्वनी द्वारे सांगत होती. दि. १ जुन रोजी बुधवारी रात्री ७ वाजता सुवर्णाच्या आईने सुवर्णास फोन केल्यानंतर माझी नणंद एक महिन्यापासुन येथे आली असुन ती २ लाख रुपयांसाठी माझ्याशी सतत भांडत असल्याचे सुवर्णा हिने सांगितले होते. दुसऱ्या दिवशी आईची चिंता वाढल्याने तिने दि. २ जुन रोजी सकाळी १० वाजता पुन्हा सुवर्णा हिस फोन लावण्याचा प्रयत्न केला असता तिचा फोन बंद स्थितीत येत होता. यानंतर अवघ्या तासाभरातच सुवर्णाच्या आईला सुवर्णाच्या जेठाने फोन करुन तिने गळफास घेऊन आत्महत्या केल्याचे कळविले. दरम्यान घराचा दरवाजा आतुन बंद असल्याने शेजारील एका लहान मुलाने तिला आवाज देण्याचा प्रयत्न केला असता सुवर्णा हिचा काहीच प्रतिसाद मिळत नसल्याने मुलाने खिडकी उघडुन बघीतले असता तिचा मृतदेह छताला लटकलेल्या अवस्थेत आढळून आल्याने गावात सर्वत्र चर्चा पसरली.
सुवर्णाचा जेठ मोहन चुडामण पाटील हा नाशिक येथे राहत असुन त्याचा अपघात झालेला असल्याने तो तेथील ओखार्ड हाॅस्पिटल मध्ये उपचार घेत असल्याने त्याचा भाऊ योगेश हा देखील देखभाल करण्यासाठी गेलेला असुन सुवर्णाची सासु ही दोन दिवसांपासून बाहेरगावी गेलेली आहे. तर सासरे चुडामण पाटील हे पाचोरा येथे सुर्यफुल विकण्यासाठी गेलेले असल्याचे सांगण्यात आले. घटने प्रसंगी सुवर्णा व तिची नणंद या दोन्हीच घरी होत्या. घटनास्थळी पोलिस उपअधीक्षक भारत काकडे, पोलिस निरीक्षक किसनराव नजनपाटील यांनी भेट दिली. घटनेप्रकरणी पाचोरा पोलिसात अकस्मात मृत्यूची नोंद करण्यात आली असुन पुढील तपास पाचोरा पोलिस करत आहेत.
