जळगाव मिरर | २७ एप्रिल २०२५
जुन्या वादातून मेहरूण परिसरातील रामेश्वर कॉलनी भागात राहणाऱ्या २६ वर्षीय रिक्षाचालकाच्या घरावर गोळीबार झाल्याची घटना २४ एप्रिलच्या मध्यरात्री दीड वाजेच्या सुमारास घडली. सुदैवाने गोळी लोखंडी गेटवर आदळून तिचे तुकडे झाले. त्यामुळे कुणालाही दुखापत झालेली नाही. रिक्षाचालकाच्या फिर्यादीवरून एमआयडीसी पोलिसात मंगळवारी तीन जणांविरुद्ध गुन्हा दाखल झाला.
सविस्तर वृत्त असे कि, शहरातील रामेश्वर कॉलनीत राम विश्वास बोरसे हे कुटुंबासह वास्तव्यास आहेत. रिक्षा चालवून ते कुटूंबाचा उदरनिर्वाह करतात. याच भागात त्यांचा मित्र दिनेश भारत चौधरी राहतो. सन २०२१ मध्ये दोघांत वाद झाला होता. त्यानंतर दिनेश हा राम यांना अधून-मधून शिवीगाळ व दमदाटी करत होता. १ एप्रिललाही राम यांना मारहाण करण्यात आली होती. २४ एप्रिल रोजी भावाला कुसुंबा येथे सोडून रात्री १.१५ वाजता घरी पोहोचले. दरम्यान, घरात प्रचंड उकाडा होत असल्याने लाकडी दरवाजा न लावता केवळ लोखंडी ग्रीलचा दरवाजा लावून बोरसे कुटुंबीय झोपी गेले. तर राम हे जेवण करत होते. जेवण करत असताना राम यांना अचानक गोळीबार झाल्याचा आवाज आला. त्यामुळे वडीलांसह त्यांनी दरवाज्याजवळ धाव घेतली. तेव्हा त्यांच्या घराच्या कंपाउंडमध्ये दोन तरूण तर रस्त्यावर बाइकवर एक तरूण बसलेला दिसून आला. राम यांच्या वडिलांनी आरडाओरड करताच कंपाउंडमधल्या दोघांनी दुचाकीकडे धाव घेतली आणि तिघे हल्लेखोर तेथून पसार झाले. मात्र, तिघांमधील एक हा दिनेश चौधरी असल्याचे पोलिसांनी सांगितले. राम बोरसे हे घराबाहेर आल्यावर त्यांना लोखंडी ग्रीलवर गोळी आदळून पुंगळी अडकल्याचे दिसले. त्यांनी तातडीने ही घटना भावाला कळवली. त्यानंतर मंगळवारी एमआयडीसी पोलिस ठाणे गाठून संपूर्ण हकीकत सांगितल्यावर दिनेश चौधरीसह तीन जणांविरुद्ध गुन्हा दाखल झाला.
