जळगाव मिरर | १८ जून २०२५
रावेर पोलिस स्टेशन हद्दीतून मोटारसायकल चोरी करणाऱ्या एका चोरट्यास अटक करण्यात रावेर पोलिसांना यश आले असून, त्याच्या ताब्यातून दोन मोटारसायकली जप्त करण्यात आल्या आहेत. या कारवाईमुळे शहरात पोलीस निरीक्षक डॉ. विशाल जयस्वाल यांच्या कार्यपद्धतीचे कौतुक नागरिकांमधून होत आहे.
दि. ५ रोजी नागझिरी मोहल्ल्यातील रहिवासी शेख अकील शेख कलीम यांची हिरो होंडा कंपनीची सुपर स्प्लेंडर (लाल रंग – क्र. MH 19 CS 0392) ही मोटारसायकल रावेर ते रसलपूर रोडवरील हॉटेल S2 समोरून अज्ञात चोरट्याने चोरून नेली होती. या प्रकरणी रावेर पोलिस स्टेशनला गुन्हा दाखल करण्यात आला होता.
पोलीस निरीक्षक डॉ. विशाल जयस्वाल यांच्या मार्गदर्शनाखाली तपासचक्र फिरवत, गुन्ह्याच्या ठिकाणावरील सीसीटीव्ही फुटेजची बारकाईने तपासणी करण्यात आली. यातून आरोपीची ओळख पटवण्यात पोलिसांना यश आले. त्यानुसार सुशील सुधाकर तायडे (वय ४४, रा. रसलपूर, ता. रावेर) यास ताब्यात घेऊन सखोल चौकशी केली असता चोरीस गेलेली सुपर स्प्लेंडर (एमएच 19 एससी 0392) आणि दुसरी एक हिरो होंडा स्प्लेंडर प्लस (काळा रंग – क्र. एमपी 68 एमई 5954) अशी एकूण दोन मोटारसायकली आरोपीच्या ताब्यातून हस्तगत करण्यात आल्या आहेत.
ही यशस्वी कारवाई पोलीस निरीक्षक डॉ. विशाल जयस्वाल यांच्या मार्गदर्शनाखाली पोहेकॉ. सिकंदर तडवी, पोना. कल्पेश आमोदकर, पोकॉ. सचिन घुगे, विशाल पाटील, प्रमोद पाटील, महेश मोगरे, श्रीकांत चव्हाण, सुकेश तडवी, विकारुद्दीन शेख यांच्या पथकाने केली. या कारवाईमुळे रावेरमधील चोरीच्या घटनांवर आळा बसेल अशी नागरिकांची अपेक्षा असून, रावेर पोलिसांचे कामगिरीबद्दल सर्वत्र कौतुक होत आहे.
