जळगाव मिरर | २५ जून २०२५
राज्यातील अनेक ठिकाणी धक्कादायक घटना उघडकीस येत असतांना आता नाशिक जिल्ह्यातून एक धक्कादायक घटना समोर आली आहे. कौटुंबिक कलहामुळे नैराश्यात असलेल्या नाशिक शहर पोलिस कर्मचाऱ्याने स्वत:च्या सहा वर्षीय चिमुकलीचा गळफास देऊन खून केला. त्यानंतर स्वत: गळफास घेऊन आत्महत्या केली. ही हृदयद्रावक घटना नाशिकरोड भागातील जेलरोड परिसरात घडली.
स्वप्निल गायकवाड, वय 34 वर्ष, रा. योगमळा, मॉडेल कॉलनी, असे मृत पोलिस कर्मचाऱ्याचे नाव आहे, तर मुलीचे नाव भैरवी, वय 6 वर्ष आहे. मंगळवार दि. 24 जून रोजी सायंकाळी साडेपाच वाजेच्या सुमारास ही घटना उघड झाली. रात्री उशिरापर्यंत पंचनामा करण्यासह गुन्हा नोंदविण्याचे काम सुरू होते.
पोलिसांनी दिलेल्या माहितीनुसार, स्वप्निल हा पोलिस शिपाई पदावर उपनगर पोलिस ठाण्यात कार्यरत होता. दीड वर्षापूर्वी स्वप्निलचा दुचाकी अपघात झाल्याने त्याच्या डोक्याला गंभीर दुखापत झाली होती. यामुळे काही महिने तो कोमात होता. प्रकृती सुधारल्यानंतर कुटुंबात कलह सुरू झाले. प्रेमविवाह केलेल्या स्वप्निलचे त्याच्या पत्नीसोबत सातत्याने वाद सुरू होते.
त्यातूनच काही महिन्यांपासून त्याची पत्नी विभक्त राहत असल्याने सहा वर्षीय भैरवी स्वप्निलकडे वास्तव्यास होती. कौटुंबिक कलह आणि आजारपणाने त्रस्त झालेल्या स्वप्निलने नैराश्यातून भैरवीचा खून करून स्वत: आत्महत्या केल्याचा पोलिसांना संशय आहे. या प्रकरणी पोलिस तपास करीत आहेत. या घटनेमुळे जेलरोड परिसरासह संपूर्ण पोलिस दलात खळबळ उडाली असून, वरिष्ठ पोलिस अधिकाऱ्यांसह परिसरातील रहिवाशांनी हळहळ व्यक्त केली.
