जळगाव मिरर | २६ जून २०२५
छत्रपती संभाजीनगर-जळगाव महामार्गावर कारने दिलेल्या धडकेत अडीच वर्षाच्या चिमुकलीसह आई गंभीर जखमी झाल्याची घटना घडली होती. याप्रकरणी उपचारानंतर पहूर पोलिसात जळगाव येथील शासकीय वैद्यकीय महाविद्यालय व रुग्णालयातील स्त्री रोग विभागातील सहायक प्राध्यापक डॉ. मिताली गोलेचा यांच्याविरुद्ध गुन्हा दाखल करण्यात आला आहे.
सविस्तर वृत्त असे कि, शासकीय वैद्यकीय महाविद्यालय व रुग्णालयातील स्त्री रोग विभागातील सहयोगी प्राध्यापक डॉ. संजय बनसोड व सहायक प्राध्यापक म्हणून डॉ. मिताली गोलेचा हे पती-पत्नी कार्यरत आहेत. दि. ३ जून रोजी डॉक्टर पती-पत्नी हे कारने (एमएच२१, सीए८२३३) जालना येथून जळगावला जात असताना पहूर येथे छत्रपती संभाजीनगर-जळगाव महामार्गावर ज्योती गोपाल बोडखे (२३) व भाविका गोपाल बोडखे (२.५, पहूर) या मायलेकींना कारची धडक बसली होती.
कार डॉ. मिताली गोलेचा चालवीत होत्या. अपघातात भाविका गंभीर जखमी झाली आहे. मायलेकींवर जळगाव येथील रुग्णालयात उपचार केल्यानंतर मंगळवारी ज्योती गोपाल बोडखे यांच्या फिर्यादीवरून डॉ. मिताली गोलेचा यांच्याविरुद्ध पहूर पोलिसांत गुन्हा दाखल करण्यात आला आहे. तपास सहायक फौजदार रवींद्र देशमुख करत आहेत.
