जळगाव मिरर | १८ जुलै २०२५
कर्जत-जामखेड विधानसभा मतदारसंघाचे आमदार रोहित पवार सध्या त्यांच्या संतप्त भूमिकेमुळे चर्चेत आले आहेत. विधीमंडळाच्या लॉबीत झालेल्या हाणामारीनंतर झालेल्या पोलिस कारवाईच्या पार्श्वभूमीवर, रोहित पवार यांनी पोलिस अधिकाऱ्यांना थेट शब्दांत इशारा दिला असून, त्याचा व्हिडिओ सध्या सोशल मीडियावर व्हायरल होत आहे.
विधानभवनाच्या लॉबीत आमदार गोपीचंद पडळकर आणि जितेंद्र आव्हाड यांच्या समर्थकांमध्ये झालेल्या गोंधळानंतर, काही कार्यकर्त्यांना पोलिसांनी ताब्यात घेतले होते. यानंतर मध्यरात्री आमदार जितेंद्र आव्हाड आणि रोहित पवार हे त्यांच्या कार्यकर्त्यांची भेट घेण्यासाठी संबंधित पोलिस ठाण्यात गेले. मात्र, सदरील कार्यकर्ता तिथे नसल्याचे पोलिसांनी सांगितल्यावर, रोहित पवार आणि पोलिसांमध्ये वाद निर्माण झाला.
“हातवारे करायचे नाही… शहाणपणा करू नका!”
या वादाचा व्हिडिओ सध्या सोशल मीडियावर मोठ्या प्रमाणात व्हायरल होत आहे. रोहित पवार या व्हिडिओत संतप्त स्वरात पोलिस अधिकाऱ्यांना फटकारताना दिसून येतात. “शहाणपणा करू नका, बोलता येत नसेल तर बोलायचं नाही. हातवारे करून बोलायचं नाही… सांगून ठेवतो,” असे रोहित पवार म्हणताना स्पष्ट ऐकू येते.
कार्यकर्त्यांची आक्रमक भूमिका
या घटनेदरम्यान आमदार पवार यांच्यासोबत उपस्थित असलेले कार्यकर्ते देखील आक्रमक झाल्याचे दृश्य व्हिडिओमध्ये दिसत आहे. कार्यकर्त्याच्या अटकेवरून निर्माण झालेला हा वाद पोलिस ठाण्यात मोठ्या संभाषणात रूपांतरित झाला.
राजकीय वातावरण तापले
या घटनेनंतर राज्यातील राजकीय वातावरण आणखी तापले आहे. विधीमंडळातील गोंधळ, कार्यकर्त्यांची अटकेनंतरची आंदोलने आणि आता आमदारांचा संताप, यामुळे राज्याच्या कायदा-सुव्यवस्था व्यवस्थेवरही प्रश्नचिन्ह उपस्थित होत आहेत.
पुढील कारवाईची शक्यता
व्हिडिओ व्हायरल झाल्यानंतर, या प्रकरणाची अधिकृत चौकशी होणार की नाही, याकडे सर्वांचे लक्ष लागून आहे. सत्ताधारी आणि विरोधक यामधील संघर्ष आता फक्त सभागृहापुरताच न राहता, पोलिस ठाण्यापर्यंत पोहोचल्याने, आगामी राजकीय घडामोडींना वेग येण्याची शक्यता वर्तवली जात आहे.
