जळगाव मिरर | २६ जुलै २०२५
यावल तालुक्यातील डांभुर्णी या गावाकडून जळगाव जात असतांना एका दुचाकीला चार चाकी वाहनाने धडक दिली. या अपघातात दुचाकीस्वार दांपत्य व त्यांच्या मुली गंभीर जखमी झाल्या होत्या. या चौघांना मुंबई येथील रुग्णालयात उपचाराकरिता दाखल करण्यात आले होते. अपघातानंतर वाहन चालक हा पसार झाला होता.
सविस्तर वृत्त असे कि, डांभुर्णी ता. यावल या गावाकडून जळगावकडे जाणाऱ्या रस्त्यावर महादेव मंदिर आहे. या मंदिराच्या समोरून यावल शहरातील संभाजी पेठेतील रहिवासी होमगार्ड संदीप भगवान कोळी, त्याची पत्नी र-`खा कोळी आणि त्याच्या दोन्ही लहान मुली लक्ष्मी व तन्वी हे दुचाकी क्रमांक एम. एच.१९ बी. एन. ६७१० द्वारे जात होते. दरम्यान त्यांच्या दुचाकीला मारुती स्विफ्ट डिझायर कार क्रमांक एम. एच. १९ ए.पी. ५३४१ वरील अज्ञात चालकाने धडक दिली. या अपघातामध्ये चौघे गंभीर जखमी झाले होते. हा अपघात ०६ एप्रिल २०२५ रोजी घडला होता. अपघातानंतर चौघांना प्रारंभी जळगाव व नंतर मुंबई येथील रुग्णालयात दाखल करण्यात आले होते.
दरम्यान या अपघातानंतर कार चालक तेथून पसार झाला होता. या अपघात प्रकरणी यावल पोलीस ठाण्यात शुक्रवारी गुन्हा दाखल करण्यात आला आहे. पुढील तपास पोलीस निरीक्षक रंगनाथ धारबळे यांच्या मार्गदर्शनाखाली पोलीस नाईक किशोर परदेशी करीत आहे
