जळगाव मिरर | ७ ऑगस्ट २०२५
यावल-चोपडा रस्त्यावर एका विना क्रमांकाची इरटीका कारमध्ये दरोडा तथा रस्ता लुट करण्याच्या उद्देशातून पाच संशयित थांबलेले होते. शहराच्या बाहेर विरावली फाट्याच्या पुढे पोलिसांनी तेथे जावून शिताफीने चौघांना पकडले, तर कारवाई दरम्यान एक जण अंधाराचा फायदा घेत फरार झाला. पोलिसांनी वाहन व दरोडा टाकण्यासाठी त्यांच्याकडे असलेले साहित्य हस्तगत केले व यावल पोलीस ठाण्यात गुन्हा दाखल करण्यात आला आहे. अटक करण्यात आलेले चौघे जण हे मध्यप्रदेशातील रहिवासी आहेत.
सविस्तर वृत्त असे कि, चोपडा रस्त्यावर किनगावकडून यावलकडे मंगळवारी मध्यरात्रीनंतर एक संशयित वाहन येत असल्याची गोपनीय माहिती पोलीस निरीक्षक रंगनाथ धारबळे यांना मिळाली होती. तेव्हा त्यांनी तातडीने सहायक पोलीस निरीक्षक अजयकुमार वाढवे, पोलीस उपनिरीक्षक अनिल महाजन, पोलीस हवालदार सुनील पाटील, वसीम तडवी, अनिल साळुंखे, सचिन पाटील, मंगेश पाटील, ज्ञानेश्वर सपकाळे या पथकास पडताळणी करीत पाठवले. पथक मध्यरात्री दोन वाजेच्या सुमारास चोपडा रस्त्यावर निघाले. दरम्यान विरावली फाट्याच्या पुढे अंधारात विना क्रमांकाची इरटीका कार रस्त्याच्या कोपऱ्यात लावलेली त्यांना दिसली तर एक जण रस्त्यावर पाळत ठेवून असल्याचे दिसून आले.
पोलिस कारच्या दिशेने जात असतांना कार पळवण्याचा प्रयत्न चालकाने केला तर पाळत ठेवणाऱ्यास पकडण्यास पोलिस गेले असता तो अंधाराचा फायदा घेत फरार झाला. तेव्हा पोलिसांनी कार मध्ये हातात हत्यार तोंडावर काळ्या रंगाचा मास्क लावलेल्या सोहेल मकसूद खान (वय २७ रा. खजराना इंदूर, मध्य प्रदेश), परवेज अब्दुल गनी (वय ३५ रा. चंदननगर इंदूर, मध्य प्रदेश), इमरान अली शहजाद अली शाह (वय ३६ रा. खजराना इंदूर), मध्यप्रदेश व मोहम्मद वसीम मोहम्मद रशीद (वय ३४, रा. सरवटे रोड, इंदूर मध्य प्रदेश) या चौघांना त्यांनी ताब्यात घेतले. तेव्हा या चौघांविरुद्ध यावल पोलीस ठाण्यात सहायक पोलीस निरीक्षक अजयकुमार वाढवे यांच्या फिर्यादीवरून गुन्हा दाखल करण्यात आला आहे. पुढील तपास पोलीस उपनिरीक्षक अनिल महाजन करीत आहेत.
