जळगाव मिरर | ११ ऑगस्ट २०२५
डमी ग्राहक पाठवून रामानंदनगर पोलिसांच्या पथकाने कुंटणखान्यावर छापा टाकत देहविक्रीचा व्यवसाय चालवणाऱ्या संशयित दांपत्याला अटक केली आहे. रविवारी सायंकाळी साडेसात वाजता महाबळ कॉलनीतील न्यू स्टेट बँक कॉलनीत ही कारवाई करण्यात आली. तसेच पश्चिम बंगालच्या २३ वर्षीय तरुणीची सुटका करुन तिची शासकीय वस्तीगृहात रवानगी केली आहे. याबाबत रामानंद पोलिस ठाण्यात पीटा कायद्यान्वये गुन्हा दाखल करण्यात आला आहे.
सविस्तर वृत्त असे कि, रामानंदनगरचे निरीक्षक राजेंद्र गुंजाळ यांना मिळालेल्या माहितीवरून आधी डमी ग्राहकासह पथक पाठवण्यात आले. डमी ग्राहकाने पोलिसांना संकेत देताच त्यांनी न्यू स्टेट बैंक कॉलनीतील दोन मजली घरावर छापा टाकला. तेव्हा संशयित आरोपी दिनेश संजय चौधरी (वय ३५, रा.दुध फेडरेशन रोड, जळगाव) आणि त्याची पत्नी यमुना राकेश प्रजापती उर्फ भारती दिनेश चौधरी (क्य ४२, रा. देवेंद्र नगर, ह. मु. न्यू स्टेट बैंक कॉलनी, जळगाव) हे दोघे खालच्या हॉलमध्ये बसलेले होते. वरच्या मजल्यावर बंद खोलीत तरुणी व डमी ग्राहक आढळून आले. त्यानंतर पथकाने तिघांना ताब्यात घेतले. महिला कॉन्स्टेबल अर्चना घुनावत यांच्या फिर्यादीनुसार संशयित आरोपी दांपत्याविरुद्ध गुन्हा दाखल करण्यात आला आहे.
निरीक्षक राजेंद्र गुंजाळ यांच्या मार्गदर्शनाखाली उपनिरीक्षक सचिन रणशेवरे, हेड कॉन्स्टेबल सुधाकर अंभोरे, जितेंद्र राजपूत, जितेंद्र राठोड, सुशील चौधरी, पोना मनोज सुरवाडे, विनोद सूर्यवंशी, रेवानंद साळुंखे, योगेश बारी आदींनी ही कारवाई केली आहे.
