जळगाव मिरर | १३ ऑगस्ट २०२५
नागपूर जिल्ह्यातील कामठी तालुक्यातील खैरी जलाशयाजवळ मंगळवारी दुपारी एक हृदयद्रावक घटना घडली. अलका शेखर बेहुणे (वय अंदाजे ३०) या महिलेसह तिचा पाच वर्षांचा चिमुकला मुलगा अचानक कालव्याच्या पाण्यात बुडाल्याने एकच खळबळ उडाली. या घटनेने परिसरात हळहळ व्यक्त होत असून, संपूर्ण गाव शोकमग्न झाला आहे.ही दुर्दैवी घटना मंगळवारी दुपारी घडली.
माहिती मिळताच पारशिवनी पोलीस घटनास्थळी दाखल झाले. स्थानिक मच्छीमारांच्या मदतीने पाण्यात शोधमोहीम सुरू करण्यात आली असून, अद्याप आई आणि मुलगा दोघांचाही काहीही थांगपत्ता लागलेला नाही. सदर महिला आणि मुलगा कालव्यावर कशासाठी गेले होते, याची माहिती अद्याप स्पष्ट झालेली नाही. स्थानिक प्रशासन, आपत्कालीन पथक आणि पोलीस घटनास्थळी तळ ठोकून शोध मोहीम राबवत आहेत. या घटनेमुळे परिसरात शोककळा पसरली असून, पाण्यात बुडालेल्या मायलेकांच्या सुरक्षिततेसाठी नागरिक प्रार्थना करत आहेत.
