जळगाव मिरर / १९ ऑगस्ट २०२५
जळगाव महानगरपालिकेतील अनामत रक्कम परत मिळवून देण्यासाठी पाच हजार रुपयांची लाच मागणाऱ्या लिपिकासह कंत्राटी शहर समन्वयकाला लाचलुचपत प्रतिबंधक विभागाच्या जळगाव युनिटने रंगेहात पकडले. ही कारवाई आज, 19 ऑगस्ट रोजी सापळा रचून करण्यात आली
तक्रारदार हे एक कर सल्लागार असून त्यांनी एका संस्थेसाठी नव्याने बांधण्यात आलेल्या जळगाव बस स्थानकावरील वातानुकुलीत सार्वजनिक शौचालय पे अँड युज तत्वावर चालवण्यासाठी टेंडर प्रक्रियेत सहभाग घेतला होता. 4 एप्रिल रोजी मनपाकडे टेंडर सादर करताना त्यांनी 35 हजार रुपयांची अनामत रक्कम डिमांड ड्राफ्टद्वारे भरली होती. मात्र संबंधित टेंडर मंजूर न झाल्याने त्यांनी अनामत रक्कम परत मिळवण्यासाठी 29 जुलै रोजी मनपाकडे अर्ज दाखल केला.
या अर्जासंदर्भात त्यांनी महानगरपालिकेतील लिपिक आनंद जनार्दन चांदेकर यांची भेट घेतली असता, चांदेकर यांनी सदर रक्कम परत मिळवून देण्यासाठी पाच हजार रुपयांची लाच मागितली. लाच द्यायची इच्छाच नसलेल्या तक्रारदाराने त्वरित ACB कार्यालयात धाव घेऊन तक्रार दाखल केली. त्यानुसार पडताळणी करण्यात आली असता, चांदेकर यांनी लाच मागणी केली असल्याचे स्पष्ट झाले. विशेष म्हणजे, त्यांनी ही रक्कम थेट स्वतःकडे न घेता शहर समन्वयक राजेश रमण पाटील यांच्याकडे देण्यास सांगितली.
ACB च्या पथकाने आज सायंकाळी सापळा रचला. तक्रारदाराने पाच हजार रुपयांची नोटांची रक्कम दिली असता, ती रक्कम पंचासमक्ष संशयित आरोपी आनंद चांदेकर यांनी स्वीकारली. त्यानंतर त्यांना रंगेहात अटक करण्यात आली. या प्रकरणात राजेश पाटील यालाही ताब्यात घेण्यात आले आहे.
संपूर्ण कारवाई पोलीस उप अधीक्षक श्री. योगेश ठाकूर यांच्या मार्गदर्शनाखाली पोलीस निरीक्षक हेमंत नागरे यांच्या नेतृत्वाखाली करण्यात आली. या सापळा कारवाईत GPSI सुरेश पाटील, पोना बाळू मराठे आणि पोकॉ भूषण पाटील यांनी सहभाग घेतला. या कारवाईमुळे मनपामधील लाचखोरीविरोधात जनतेतून समाधान व्यक्त होत आहे.
