जळगाव मिरर | २३ ऑगस्ट २०२५
गेल्या काही महिन्यापासून राज्यातील हनी ट्रॅप आणि लैंगिक अत्याचाराच्या प्रकरणात आरोपी प्रफुल्ल लोढाच्या आता अडचणी वाढल्या आहेत. पुण्यातील बावधन पोलिस ठाण्यात एका 36 वर्षीय महिलेने लोढाविरोधात आणखी एक तक्रार दाखल केली आहे. या गुन्ह्याच्या तपासासाठी पिंपरी-चिंचवडच्या बावधन पोलिसांनी लोढाला ताब्यात घेतले आहे. त्यासाठी कोर्टाकडून वॉरंट मागवून आज सकाळी आर्थर रोड कारागृहातून लोढाला बावधन पोलिसांच्या ताब्यात देण्यात आले आहे.
मिळालेल्या माहितीनुसार, पुणे येथील बालेवाडीमधील एका नामांकित हॉटेलमध्ये 27 मे 2025 रोजी प्रफुल्ल लोढाने एका 36 वर्षीय महिलेवर लैंगिक अत्याचार केल्याची तक्रार दाखल झाली आहे. लोढाने पीडित महिलेच्या पतीला नोकरी देण्याचे आमिष दाखवून तिला हॉटेलवर बोलावले होते. लोढावर यापूर्वीही मुंबईतील अंधेरी एमआयडीसी आणि साकीनाका पोलिस ठाण्यांत हनी ट्रॅप आणि अल्पवयीन मुलीवर अत्याचार केल्याप्रकरणी गुन्हे दाखल आहेत. या नवीन प्रकरणाच्या चौकशीत पुढे काय समोर येते आणि लोढाला न्यायालयात हजर केल्यावर काय निर्णय होतो हे पाहणे महत्त्वाचे ठरेल.
प्रफुल्ल लोढा आहेत तरी कोण ?
जळगाव जिल्ह्यातील प्रफुल्ल लोढा एकेकाळी मातब्बर नेत्याचे निकटवर्तीय म्हणून ओळखले जात होते. मात्र, नंतर त्यांनी त्याच नेत्यावर गंभीर आरोप केले. त्यानंतर त्यांनी वंचित बहुजन आघाडीमध्ये प्रवेश केला आणि त्यांना 2024 च्या लोकसभा निवडणुकीसाठी उमेदवारीही मिळाली, पण अवघ्या पाच दिवसांत त्यांनी माघार घेतली. कथित समाजसेवक आणि ‘आरोग्यदूत’ म्हणून ओळख असलेल्या या प्रफुल्ल लोढा यांच्याविरोधात यापूर्वीही काही गुन्हे दाखल असल्याची माहिती आहे.
