जळगाव मिरर | २४ ऑगस्ट २०२५
जळगाव जिल्ह्यात वीजग्राहकांकडे महावितरणची मोठ्या प्रमाणावर थकबाकी असल्याचे पुढे आले आहे. सर्वच ग्राहकांचा यामध्ये समावेश आहे. एकूण २ लाख ७१ हजार ७३९ ग्राहकांकडील ५३२ कोटी ४९ लाखांची वीजबिले थकीत आहेत. यामध्ये शासकीय बिलांचाही समावेश आहे. त्यामुळे थकबाकी वसुलीचे मोठे आव्हान महावितरणसमोर आहे.
जिल्ह्यात सर्वाधिक थकबाकी सावदा विभागात आहे. या विभागात २६ हजार ७२९ ग्राहकांकडे १५२ कोटी ७४ लाखांची थकबाकी आहे. त्या खालोखाल धरणगाव विभागात ५६ हजार १६ ग्राहकांकडे १२२ कोटी ७६ लाख आणि भुसावळ विभागात ४३ हजार ७८० ग्राहकांकडे ६९ कोटी ८६ लाख रुपयांची थकबाकी आहे. इतर विभागांतही थकबाकीचे लक्षणीय प्रमाण आहे. पाचोरा विभागात ४७ हजार ८७८ ग्राहकांकडे ५८ कोटी ९९ लाख रुपयांची थकबाकी आहे. यानंतर जळगाव विभागात ४४ हजार ५७९ ग्राहकांकडे ४९ कोटी ५२ लाख, मुक्ताईनगर विभागात १९ हजार ६२८ ग्राहकांकडे ४० कोटी ७४ लाख आणि चाळीसगाव विभागात ३३ हजार १२९ ग्राहकांकडे ३७ कोटी ८७ लाख रुपयांची थकबाकी आहे. या आकडेवारीवरून हे स्पष्ट होते की, शहरी व ग्रामीण दोन्ही भागांतील ग्राहकांकडे मोठी थकबाकी आहे.
वर्गवारीनिहाय विचार केला असता जिल्ह्यातील २ लाख ४५ हजार ३१९ घरगुती ग्राहकांकडे ५५ कोटी २० लाख, १५ हजार ४२८ व्यावसायिक ग्राहकांकडे १० कोटी ६ लाख, तर २८१९ औद्योगिक ग्राहकांकडे ३२ कोटी ३० लाखांची थकबाकी आहे. पथदिव्यांचे १७४ कोटी २ लाख, सार्वजनिक पाणीपुरवठा योजनांचे २५६ कोटी १३ लाख यांसह शासकीय कार्यालये व इतर ग्राहकांचे ४ कोटी ३३ लाख थकीत आहेत. या आकडेवारीमुळे महावितरणच्या आर्थिक स्थितीवर गंभीर परिणाम होत असून, भविष्यात वीजपुरवठ्यावरही त्याचा परिणाम होण्याची शक्यता नाकारता येत नाही. थकबाकी वाढल्याने महावितरण आर्थिक संकटात सापडले आहे. त्यामुळे ही थकबाकी वसूल करण्यासाठी महावितरणकडून कठोर पावले उचलली जाण्याची शक्यता आहे.
कठोर पावले उचलणार
ही थकबाकी वसूल करण्यासाठी महावितरणकडून कठोर पावले उचलली जाण्याची शक्यता आहे. वीजपुरवठा खंडित करणे, थकबाकीदारांवर कायदेशीर कारवाई करणे, असे उपाय योजले जाऊ शकतात. वीजबिल भरून महावितरणला सहकार्य करण्याचे आवाहन महावितरण प्रशासनाने केले आहे.
