जळगाव मिरर | १ सप्टेंबर २०२५
राज्यातील अनेक शहरात अल्पवयीन मुलीसह तरुणीवर अत्याचाराच्या घटना सातत्याने समोर येत असतांना आता जीवनसाथी मॅट्रिमोनी या साेशल मिडियावरील विवाह विषयक संकेतस्थळावरुन झालेल्या ओळखीतून एका ३३ वर्षीय तरुणीवर बलात्कार करण्यात आल्याची घटना उघडकीस आली. सदर शारिरिक संबंधाचे फाेटाे आणि व्हिडिओ सोशल मिडियावर प्रसारित करण्याची धमकी देऊन महिलेकडून दोन लाख रुपये उकळण्यात आल्याचा धक्कादायक प्रकार उघडकीस आला आहे. याप्रकरणी आराेपी विरुद्ध खराडी पोलिसांकडून गुन्हा दाखल करण्यात आला आहे.
सविस्तर वृत्त असे कि, अमित गंगाधर शेंडगे (रा. पारगाव, जि. सोलापूर) असे गु्न्हा दाखल झालेल्या आराेपीचे नाव आहे. याबाबत पिडित महिलेने खराडी पोलीस ठाण्यात आराेपी विराेधात फिर्याद दिली आहे. पोलिसांनी दिलेल्या माहितीनुसार, पीडित महिला आणि आरोपी शेंडगे यांची मागील वर्षी सप्टेंबर महिन्यात जीवनसाथी मेट्राेमिनी या विवाह विषयक संकेतस्थळावरुन ओळख झाली होती. शेंडगेने महिलेला लग्नाचे आमिष दाखवून तिला प्रेमाच्या जाळ्यात ओढले. त्यानंतर तो महिलेला भेटण्यासाठी साेलापूर येथून पुण्यात आला. एका हाॅटेलमध्ये महिलेला नेऊन त्याने तिच्यावर जबरदस्तीने बलात्कार केला, तसेच तिचे आक्षेपार्ह फाेटाे, व्हिडिआे त्याने मोबाइलवर काढले. त्यानंतर शेंडगेने महिलेला ब्लॅकमेलिंग करत धमकावण्यास सुरुवात केली. हाॅटेलमध्ये काढलेले आक्षेपार्ह फाेटाे महिलेचे नातेवाईक आणि साेशल मिडियावर प्रसारित करण्याची धमकी देऊन तिच्याकडून दोन लाख रुपये घेतले.
दरम्यान, आराेपीला महिलेने विवाहाबाबत विचारणा केली. त्यावेळी त्याने लग्नाची विचारणा केल्यास विषारी ओैषध पिऊन आत्महत्या करण्याची धमकी तिला दिली. त्याच्या धमकीमुळे घाबरलेल्या महिलेने याबाबत खराडी पोलीस ठाण्यात फिर्याद दिली. बलात्कार, तसेच माहिती-तंत्रज्ञान कायद्यान्वये आरोपीविरुद्ध गुन्हा दाखल करण्यात आला.महिला पोलीस उपनिरीक्षक मोनाली भदे पुढील तपास करत आहेत.
