जळगाव मिरर | २९ सप्टेंबर २०२५
भडगाव तालुक्यातील पिंपरखेड येथे विद्युत खांबावर डीपीचे काम करत असताना अचानक वीजप्रवाह सुरू झाल्याने भानुदास महाजन नामक वायरमन गंभीर जखमी झाले आहेत. ही धक्कादायक घटना गुरुवारी दुपारी १ वाजेच्या सुमारास घडली. जखमी वायरमनवर सध्या पाचोरा येथील खासगी रुग्णालयात उपचार सुरू आहेत.
सविस्तर वृत्त असे कि, पिंपरखेड येथील वीजपुरवठा खंडित असल्याने प्राथमिक आरोग्य केंद्राजवळील विद्युत डीपीचे काम सुरू होते. हे काम करण्यासाठी आमडदे सबस्टेशन येथून आमडदे आणि पिंपरखेड दोन्ही ठिकाणचा वीजपुरवठा बंद करण्याचे परमिट (परवानगी) घेण्यात आले होते. आमडदे पिंपरखेड येथील डीपीचे काम सुरू असताना, आमडदे सबस्टेशनमधील आऊटसोर्सिंग कर्मचारी जगदीश वाघ यांनी अचानक वीजपुरवठा सुरू केला. ही चूक त्वरित लक्षात येताच त्यांनी तात्काळ वीजपुरवठा पुन्हा बंद केला. या घटनेची माहिती देण्यासाठी आमडदे शाखा अभियंत्यांशी वारंवार संपर्क साधण्याचा प्रयत्न करण्यात आला, मात्र त्यांनी भ्रमणध्वनी उचलला नाही. त्यामुळे संतप्त झालेल्या पिंपरखेडच्या ग्रामस्थांनी आमडदे येथील सबस्टेशनला कुलूप ठोकून आपला संताप व्यक्त केला आमच्या गावात अनेक ठिकाणी विद्युत तारा लोंबकळत आहेत. दोन डीपी मंजूर असतानाही आमडदे शाखा अभियंता याकडे दुर्लक्ष करत आहेत,’ अशी तक्रार ग्रामस्थांनी यावेळी केली.
या घटनेबाबत पोलीस ठाण्यात कोणतीही नोंद नसून, माजी सरपंच अजय महाजन, अरुण भोसले, राजेंद्र कोळी, सागर पाटील, दिनेश सुर्ववशी, अविनाश पाटील अरुण बडगुजर यांच्यासह ग्रामस्थांनी पोलीस निरीक्षक महेश शर्मा आणि वीज वितरण कंपनीचे उपकार्यकारी अभियंता आळतेकर यांना निवेदन दिले आहे. या निवेदनात त्यांनी शाखा अभियंत्यांवर कठोर कारवाई करण्याची मागणी केली आहे. दरम्यान, घटनेत जखमी वायरमन भानुदास महाजन यांना खांबावरून खाली उतरवून मदत करणारे ग्रामपंचायत कर्मचारी जगन गायकवाड, ग्रामस्थ सोनु बडगुजर, भरत बडगुजर, पंकज बडगुजर यांचा पोलीस स्टेशनतर्फे प्रमाणपत्र देऊन सत्कार करण्यात येणार असल्याची माहिती पोलीस निरीक्षक महेश शर्मा यांनी दिली आहे.
