जळगाव मिरर । २९ सप्टेंबर २०२५
आठ दिवसांपूर्वीच जिल्हा कारागृहामध्ये आलेल्या सोहम गोपाल ठाकरे (२०) याला झोपेतून उठवून दोन बंद्यांनी बॅरेकच्या दरवाजावर आदळत मारहाण केली. ही घटना २७ सप्टेंबर रोजी जिल्हा कारागृहात घडली. या प्रकरणी कुणाल गोपाल चौधरी व अजय मोरे या दोन बंद्यांविरुद्ध जिल्हापेठ पोलिस ठाण्यात गुन्हा दाखल करण्यात आला आहे.
सविस्तर वृत्त असे कि, एमआयडीसी पोलिस ठाण्यात दाखल एका गुन्ह्यातील सोहम ठाकरे याला २० सप्टेंबर रोजी जिल्हा कारागृहातील बॅरेक क्रमांक १३मध्ये तीन क्रमांकाच्या सर्कलमध्ये ठेवण्यात आले. २७ सप्टेंबर रोजी सकाळी तो झोपलेला असताना तेथे कुणाल चौधरी हा आला व पायाने धक्का देत उठविले व बाहेर ये, मला तुझ्याशी काम असल्याचे सांगू लागला. सोहम उठताच त्याला मारहाण करू सुरू केली.
तसेच अजय मोरे याने पकडून ठेवले व कुणालने बॅरेकवर डोके आपटून सोहमला दुखापत केली. त्यामुळे त्याच्या कपाळ, नाकातून रक्त येऊ लागले. त्या वेळी इतरांनी तरुणाची सुटका केली. बंद्याला मारहाण होऊन रक्त येत असताना घटनेच्या १० मिनिटांनंतर कर्मचारी तेथे आला. या प्रकरणी सोहम ठाकरे याने जिल्हापेठ पोलिस ठाण्यात फिर्याद दिली. त्यावरून मारहाण करणाऱ्या कुणाल चौधरी व अजय मोरे या दोघांविरुद्ध गुन्हा दाखल करण्यात आला आहे
