जळगाव मिरर । २९ ऑक्टोबर २०२५
पारोळा तालुक्यातील कडजी गावाजवळ कंटेनरला बसने मागून धडक दिल्याने झालेल्या अपघातात चालक वाहकासह नऊ प्रवासी जखमी झाल्याची घटना २८ रोजी सायंकाळी ६.३० वाजेच्या सुमारास घडली.
सविस्तर वृत्त असे कि, नाशिकहून बस (एमएच- २०, २५७९) ही मालेगाव, धुळे बायपास जळगावचा दिशेने जात होती. राष्ट्रीय महामार्ग ५३ वरील कडजी गावाजवळील वळणावर समोर चालत असलेल्या कंटेनरने अचानक ब्रेक मारल्याने कंटेनरची गती लक्षात न आल्याने व रिपरिप पावसामुळे बसने कंटेनरला मागाहून जबर धडक दिली. या अपघातात बस चालक विनोद विक्रम सैंदाणे (४६, रा. जळगाव), वाहक राहुल दिगंबर पाटील (३८, जळगाव) यांच्यासह बसमधील शेख मोहम्मद इलियास (३२ एरंडोल), शाहिस्ता इलियाज शेख (२२, एरंडोल), श्रवण मुरलीधर माळी (४५, पारोळा), शेख असिफ शेख नजीब (३३, कासोदा), शेख हारून रशीद शेख मुनीर (६०, जळगाव), रितेश देवेंद्र भामरे (२८, मेहरगाव, ता.जि. धुळे), रूपाली मोतीलाल पाटील (२८ नगाव, ता. अमळनेर) हे प्रवासी जखमी झाले आहेत. घटनेची माहिती मिळताच रुग्णवाहिका चालक आशुतोष शेलार, वसिम शेख यांनी घटनास्थळी धाव घेत जखमींना तत्काळ पारोळा कुटीर रुग्णालयात दाखल केले. जखमींवर डॉ. गिरीश जोशी, डॉ. महेश पवार, डॉ. सचिन करोडपती, डॉ. चेतन करोडपती, डॉ. पुरुषोत्तम पाटील, डॉ. मिलिंद श्रॉफ, परिचारिका सोनाली गुरव, प्रतिमा मुराडी आदींनी उपचार केलेत.
यातील दोन जखमींना जळगाव तर एकाला धुळे येथे हलविल्याची माहिती वैद्यकीय अधिकाऱ्यांनी दिली आहे. दरम्यान, अपघातामुळे घटनास्थळी काही वेळ वाहतूक ठप्प झाली होती. पो.नि. अशोक पवार, पो.उ.नि. योगेश महाजन, पो.उ.नि. विजय भोंबे, अभिजीत पाटील, प्रवीण पाटील, संतोष महाजन, भूषण पाटील, आकाश पाटील यांनी वाहतूक सुरळीत केली. या घटनेबाबत पोलिस ठाण्यात रात्री उशिरापर्यंत नोंद करण्याचे काम सुरू होते.
