जळगाव मिरर । ८ नोव्हेंबर २०२५
ऑनलाईन टास्कमधून झटपट पैसे कमवण्याचे आमिष दाखवून शहरातील रमेश सोनार (वय ४५, रा. ज्ञानदेव नगर) यांना ३ लाख ६० हजार रुपयात गंडविले. ही घटना दि. ६ नोव्हेंबर उघडकीस आली आहे. या प्रकरणी अज्ञाताविरुद्ध शनिपेठ पोलीस ठाण्यात गुन्हा दाखल करण्यात आला आहे.
सविस्तर वृत्त असे की , शहरातील ज्ञानदेव नगरात रमेश सोनार (वय ४५) हे वास्तव्यास असून ते महाविद्यालयात क्लार्क म्हणून नोकरीस आहे. त्यांना दि. ५ ऑक्टोंबर रोजी ‘टेलिग्राम’ या सोशल मीडिया अॅपवर एक मॅसेज आला. व्हिडिओ आणि फोटो लाईक केल्यास प्रत्येक लाईकवर १०० रुपये मिळतील, असे आमिष त्यात दाखवण्यात आले होते. सोनार यांनी सुरुवातीचे काम पूर्ण केले असता, त्यांना ६६० रुपये मिळाले. यामुळे त्यांचा विश्वास बसला. त्यानंतर त्यांना बीटकॉईन आणि क्रिप्टोकरन्सी मध्ये गुंतवणूक करून मोठा नफा मिळवण्याचा ‘इकॉनॉमी टास्क’ पूर्ण करण्यास सांगण्यात आले. यासाठी त्यातही त्यांना काही प्रमाणात नफा झाल्याचा मॅसेज आला
मिळालेला नफा खरा वाटल्यामुळे, त्यांना मोठ्या गुंतवणुकीसाठी प्रवृत्त करण्यात आले. २८ हजार रुपये भरल्यास ४२ हजार रुपये मिळतील असे सांगितले गेले. यासाठी सोनार यांनी त्यांच्या त्यांच्याकडील बँकांच्या ‘क्रेडिट कार्ड’ चा वापर करून वेगवेगळ्या तारखांना एकूण ३ लाख ६० हजार रुपये विविध बँक खात्यांमध्ये हस्तांतरित केले.
दि. ८ ऑक्टोबरला जेव्हा त्यांनी आपले ‘मिन्ट’ खाते तपासले, तेव्हा त्यात पैसे वाढण्याऐवजी दीड लाख रुपयांचा तोटा दाखवत होता. याबद्दल विचारणा केली असता, ‘डेटा रिपेअर’ करण्यासाठी आणखी दीड लाख रुपये भरावे लागतील, असे सांगण्यात आले. फसवणूक झाल्याचे लक्षात येताच सोनार यांनी तत्काळ शनिपेठ पोलीस ठाण्यात आपली तक्रार दिली त्यानुसार गुन्हा दाखल करण्यात आला आहे.
