जळगाव मीरर | १९ नोव्हेंबर २०२५
जळगाव शहरातील लक्ष्मी नगर भागात दोन महिने बंद असलेल्या घरात घरफोडी करून विविध संसारोपयोगी वस्तू चोरणाऱ्या टोळीला एमआयडीसी पोलीस स्टेशनच्या गुन्हे शोध पथकाने अटक केली आहे. पोलिसांनी या कारवाईत ५२ हजार रुपये किमतीचा चोरीचा मुद्देमाल जप्त केला आहे.
मिळालेल्या माहितीनुसार, लक्ष्मी नगर येथे राहणारे राजेंद्र दुसाने यांच्या बंद घरात एलईडी टीव्ही, फ्रीज, कुलर, गॅस शेगडी, तांबे-पितळी भांडी आणि इतर साहित्य चोरीला गेल्याचे १२ नोव्हेंबर रोजी उघड झाले. यावरून एमआयडीसी पोलिसांत गुन्हा नोंदविण्यात आला होता.
गुन्ह्यातील आरोपींचा शोध घेण्यासाठी पोलीस निरीक्षक बबन आव्हाड यांनी पोउनि राहुल तायडे, पोउनि चंद्रकांत धनके यांच्यासह अनुभवी कर्मचाऱ्यांचे पथक तयार केले. गोपनीय माहितीच्या आधारे पथकाने लक्ष्मी नगर भागात सापळा रचून संदीप तुळशीराम शेवरे याला ताब्यात घेतले. चौकशीदरम्यान त्याने साथीदार राहुल सुपडू चौधरी व एका अल्पवयीन मुलासह घरफोडी केल्याची कबुली दिली.
पोलिसांनी मुख्य आरोपीकडून ५२ हजार रुपये किमतीचा मुद्देमाल तसेच गुन्ह्यावेळी वापरलेली रिक्षा जप्त केली असून पुढील तपास एमआयडीसी पोलीस ठाण्याचे पथक करीत आहे.
