जळगाव मिरर | २९ नोव्हेंबर २०२५
राज्याची उपराजधानी असलेल्या नागपूर शहरातून एक मोठी बातमी समोर आली आहे. महायुती सरकारमधील उपमुख्यमंत्री अजित पवार यांच्या नेतृत्वाखालील सत्ताधारी राष्ट्रवादी काँग्रेसच्या प्रचारसभेत एक अनोखी घटना घडली आहे. नागपूरच्या कामठी येथे राष्ट्रवादी काँग्रेसचे नगराध्यक्षपदाचे उमेदवार शाहजहाँ शफावत अन्सारी यांच्यावर एका तरुणाने अचानक नोटांचा वर्षाव केला. या घटनेचा व्हिडिओ सोशल मीडियावर मोठ्या प्रमाणावर व्हायरल झाला असून त्यावर विविध प्रतिक्रिया उमटत आहेत.
कामठी नगरपरिषद निवडणुकीचा प्रचार अंतिम टप्प्यात आहे. शुक्रवारी रात्री झालेल्या सभेत अन्सारी भाषण करत असताना एक तरुण अचानक मंचाकडे आला आणि त्यांच्या अंगावर रु. नोटा फेकायला सुरुवात केली. या प्रसंगात अन्सारी यांनी तरुणाला थांबवण्याचा प्रयत्न न करता त्याला जवळ घेत आपुलकी दाखवली.
यावेळी त्या तरुणानेही भावनिक शब्दांत आपली भावना व्यक्त केली. “माझ्या नेत्याला कुठल्या चिन्हाची गरज नाही. हिंदू असो वा मुसलमान, गरज पडली तर लोक काँग्रेस भवनात जात नाहीत, ते थेट शाहजहाँ सेठकडेच येतात,” असे तो म्हणाला. त्याचे हे बोल ऐकून अन्सारी यांनी त्याची पाठ थोपटत त्याचे कौतुक केले.
सभेत उपस्थित काही नागरिकांनीही या कृतीचे शब्दांनी स्वागत केले. त्यामुळे कार्यक्रमातील वातावरण काही काळ गजबजलेले होते. मात्र, निवडणूक प्रचारादरम्यान उमेदवारावर नोटा उधळल्याची घटना बेकायदेशीर प्रचार खर्च, आकर्षण किंवा प्रलोभन अशा संदर्भात आक्षेपार्ह ठरू शकते, अशी चर्चा राजकीय वर्तुळात सुरू आहे. यामुळे आता या प्रकरणी निवडणूक आयोग कोणती कारवाई करणार हे पाहणे महत्त्वाचे ठरणार आहे. व्हायरल व्हिडिओवरून विरोधकांकडूनही प्रतिक्रिया येण्याची शक्यता आहे.
