जळगाव मिरर | ४ फेब्रुवारी २०२६
मुंबईच्या अंधेरी पश्चिम भागातील लोखंडवाला परिसरात एक धक्कादायक आणि थरारक घटना घडली आहे. एका 29 वर्षीय तरुणाने एका महिलेच्या अंगावर कार चढवत तिला ठार मारण्याचा प्रयत्न केल्याचा प्रकार समोर आला आहे. या संपूर्ण घटनेचे सीसीटीव्ही फुटेज उपलब्ध झाले असून, ओशिवारा पोलिसांनी आरोपी मोहम्मद शकील शेख याच्यावर गुन्हा दाखल करून पुढील तपास सुरू केला आहे.
मिळालेल्या माहितीनुसार, ही घटना लोखंडवाला परिसरातील अरीना बिल्डिंगच्या गेटवर रात्री सुमारे 9.30 वाजण्याच्या सुमारास घडली. आरोपी मोहम्मद शेख याने एका मॉडेल असलेल्या महिलेला यापूर्वी स्नॅपचॅटवर अॅसिड हल्ल्याची धमकी दिली होती. या धमकीबाबत जाब विचारण्यासाठी संबंधित महिलेने आरोपीला तिच्या बिल्डिंगच्या गेटवर बोलावले होते.
यावेळी दोघांमध्ये वाद झाला. रागाच्या भरात आरोपीने त्याच्या स्कोडा कारने महिलेच्या अंगावर जोरदार धडक दिली. धडकेनंतर महिला काही अंतर फरफटत गेली. ही दृश्ये इमारतीच्या सीसीटीव्ही कॅमेऱ्यात कैद झाली आहेत. महिलेच्या मदतीसाठी तिथे उपस्थित दोन नागरिक धावून गेले असता, आरोपीने त्यांच्याही अंगावर कार घालण्याचा प्रयत्न केल्याचे समोर आले आहे. या घटनेत संबंधित महिला किरकोळ जखमी झाली असून सुदैवाने मोठा अनर्थ टळला आहे.
पोलिस तपासात असेही उघड झाले आहे की, गेल्या नऊ महिन्यांपासून आरोपी मोहम्मद शेख हा पीडित मॉडेलबाबत तिच्या मित्रपरिवारात आणि कुटुंबीयांमध्ये अफवा पसरवत होता. यामुळे अनेक वेळा वाद झाले होते. काही दिवसांपूर्वी पीडित महिला आणि तिची मैत्रीण आरोपीने पसरवलेल्या अफवांबाबत जाब विचारण्यासाठी त्याच्या घरी गेल्या होत्या. मात्र, आरोपीने दरवाजा उघडला नव्हता.
पोलिसांच्या माहितीनुसार, या घटनेच्या दुसऱ्याच दिवशी पीडितेच्या मैत्रिणीच्या स्नॅपचॅटवर अॅसिड हल्ल्याची धमकी देणारा संदेश आला. या धमकीनंतरच आरोपीने थेट मॉडेल महिलेच्या अंगावर कार घालून तिला ठार मारण्याचा प्रयत्न केल्याचा आरोप आहे. ओशिवारा पोलीस या प्रकरणाचा सखोल तपास करत असून, आरोपीविरोधात गंभीर कलमान्वये गुन्हा दाखल करण्यात आला आहे. सीसीटीव्ही फुटेजच्या आधारे पुढील कारवाई केली जात आहे.
