जळगाव मिरर | ७ फेब्रुवारी २०२६
चाळीसगाव तालुक्यातील दरेगाव लोंढे येथील ऊसतोड मजूर महिलेचा पतीने कोयत्याने वार करून खून केल्याची खळबळजनक घटना पंढरपूर तालुक्यातील गोपाळपूर परिसरात घडली. या प्रकरणी पंढरपूर तालुका पोलिसांनी अवघ्या दोन तासांत आरोपी पतीला अटक केली आहे.
पोलिसांनी दिलेल्या माहितीनुसार, भानुदास आनंदा वाघ (वय ४५, रा. दरेगाव लोंढे, ता. चाळीसगाव) हा पत्नी लक्ष्मी भानुदास वाघ (वय ३५) व दोन मुलांसह पंढरपूर तालुक्यातील गोपाळपूर परिसरात ऊसतोड कामासाठी वास्तव्यास होता. सोयरी कॉलेजच्या पाठीमागील परिसरात गेल्या दहा दिवसांपासून जळगाव जिल्ह्यातील तीन ते चार ऊसतोड टोळ्या काम करत होत्या.
दरम्यान, घरगुती कारणातून पती-पत्नीमध्ये सतत वाद होत असल्याने भानुदास वाघ हा तणावात होता. मंगळवारी रात्रीही दोघांमध्ये वाद झाला. याच वादातून मंगळवारी रात्री सुमारे १२ वाजेच्या सुमारास भानुदास वाघ याने ऊसतोडीचा कोयता घेऊन पत्नी लक्ष्मीच्या मानेवर व गळ्यावर वार करून तिचा जागीच खून केला.
या घटनेची माहिती डायल ११२ वर मिळताच पंढरपूर तालुका पोलीस ठाण्याचे पोलीस निरीक्षक टी. वाय. मुजावर यांनी वरिष्ठांना माहिती दिली. उपविभागीय पोलीस अधिकारी प्रशांत डगळे, सहाय्यक पोलीस निरीक्षक विभावरी रेळेकर, पोलीस उपनिरीक्षक विक्रम वाढणे, भारत भोसले यांच्यासह पथकाने तत्काळ घटनास्थळी धाव घेतली.
घटनेनंतर आरोपी रात्रीच्या अंधाराचा फायदा घेऊन उसाच्या फडातून पळून जाण्याच्या तयारीत असताना पोलिसांनी शोधमोहीम राबवून त्यास शिताफीने ताब्यात घेतले. आरोपीकडून गुन्ह्यात वापरलेला कोयता जप्त करण्यात आला आहे. या प्रकरणी आरोपी भानुदास वाघ याच्याविरोधात पंढरपूर तालुका पोलीस ठाण्यात खुनाचा गुन्हा दाखल करण्यात आला असून पुढील तपास सुरू आहे.
