जळगाव मिरर | १३ फेब्रुवारी २०२६
भोपाल येथे एका सरकारी कर्मचाऱ्याच्या विवाहबाह्य प्रेमसंबंधामुळे निर्माण झालेला कौटुंबिक वाद अखेर परस्पर संमतीने मिटला. जवळपास पाच वर्षे चाललेल्या या प्रकरणाचा शेवट फॅमिली कोर्टातील तडजोडीत झाला असून पत्नी व मुलींच्या आर्थिक सुरक्षिततेसाठी सुमारे दीड कोटी रुपयांचा तोडगा काढण्यात आल्याची माहिती समोर आली आहे.
मिळालेल्या माहितीनुसार, 42 वर्षीय कर्मचारी आपल्या विभागातच कार्यरत असलेल्या, वयाने सुमारे दहा वर्षांनी मोठ्या महिला अधिकाऱ्याच्या प्रेमात पडला. कालांतराने दोघांमधील जवळीक वाढत गेली. या नात्याचा परिणाम त्याच्या वैवाहिक आयुष्यावर झाला आणि पती-पत्नीमध्ये सतत वाद होऊ लागले. घरातील तणावाचा परिणाम त्यांच्या 16 आणि 12 वर्षांच्या मुलींवरही होऊ लागला.
घरातील वातावरण बिघडल्याने मोठ्या मुलीने फॅमिली कोर्टाचे दरवाजे ठोठावले. त्यानंतर न्यायालयात समुपदेशनाची (काउंसलिंग) प्रक्रिया सुरू झाली. अनेक बैठकीनंतर संबंधित कर्मचाऱ्याने स्पष्ट केले की, त्याला आपल्या सहकाऱ्यासोबत राहायचे आहे आणि तो घटस्फोटासाठी तयार आहे. घरातील तणाव असहनीय झाल्याची कबुली देत असतानाच मुलींवरचे प्रेम कायम असल्याचेही त्याने सांगितले.
पत्नीने या प्रकरणात स्वतःच्या आणि मुलींच्या भविष्यासाठी आर्थिक सुरक्षिततेला प्राधान्य दिले. तिने पतीकडे डुप्लेक्स घर आणि 27 लाख रुपयांची रोख रक्कम अशी मागणी केली. विशेष म्हणजे, संबंधित महिलेने हा प्रस्ताव तत्काळ मान्य केला. घर आणि रोख रक्कम मिळून सुमारे दीड कोटी रुपये देण्याची तयारी तिने दर्शवली. प्रियकराच्या कुटुंबावर कोणतेही संकट येऊ नये, अशी तिची भूमिका असल्याचे सांगितले जाते.
अखेर दोन्ही पक्षांनी परस्पर संमतीने वेगळे होण्याचा निर्णय घेतला. या घटनेमुळे प्रेमसंबंध, कौटुंबिक जबाबदाऱ्या आणि मुलांच्या मानसिक आरोग्याचा प्रश्न पुन्हा एकदा चर्चेत आला आहे.
