जळगाव मिरर | संदीप महाले
जळगाव महानगरपालिकेच्या अतिक्रमण विभागातर्फे गेल्या काही दिवसापासून महानगरपालिकेच्या अंतर्गत असलेल्या छोट्या दुकानदारांच्या अतिक्रमणावर हातोडा मारला जात आहे मात्र अनेक ठिकाणी असलेल्या रुग्णालयाच्या अतिक्रमणावर मनपाचे ‘अर्थ’पूर्ण दुर्लक्ष आहे की काय अशी चर्चा जळगावात सुरू झाली आहे.
जळगाव महानगरपालिकेच्या इमारतीपासून अगदी पाच मिनिटांचे अंतर असलेल्या भास्कर मार्केट परिसरात अनेक खाजगी रुग्णालयांनी मोठ्या प्रमाणात अतिक्रमण केले आहे. चक्क बेसमेंटला पार्किंग असायला हवे मात्र या ठिकाणी मेडिकल, लॅब सुरू केले आहे. त्यामुळे रुग्णालयात येणाऱ्या रुग्णांच्या नातेवाईकांच्या दुचाकी व चारचाकी थेट रस्त्यावर पार्किंग करावी लागत आहे. त्यामुळे त्या रस्त्याने येणाऱ्या जाणाऱ्या नागरिकांना या अतिक्रमणाचा मोठा त्रास होत आहे. जळगाव महानगरपालिकेच्या संबंधित विभागाला याची खरच कल्पना नसेल का आणि जर असेल तर मग यावर का कारवाई मनपातर्फे केली जात नाही. की महानगरपालिका या ठिकाणी अपघात होण्याची वाट बघत आहे का असा देखील प्रश्न जळगाव शहरात चर्चिला जात आहे.
पालकमंत्र्यांसह आमदारांची याच रस्त्याने ये-जा
जळगाव जिल्ह्याचे पालकमंत्री गुलाबराव पाटील यांच्यासह आमदार राजूमामा भोळे व जिल्ह्यातील अनेक आमदार याच रस्त्याने आठवड्यातून दोन वेळेस जात असतात. मात्र तरी देखील या रस्त्यावर असलेल्या दुचाकी व चारचाकीवर कुठलेही कारवाई अद्याप झालेली नाही किंवा रुग्णालयावर मनपातर्फे आजपर्यंत कारवाई झालेली नाहीये नेमकं यामागे काही मनपाचे अर्थपूर्ण संबंध आहेत की काय अशी देखील चर्चा आता रंगू लागली आहे.
शहर वाहतूक शाखा कारवाई करणार का?
जळगाव शहरातील भास्कर मार्केट परिसरात दुचाकी व चारचाकी थेट रस्त्यावर लागत असल्याने येणाऱ्या जाणाऱ्या नागरिकांना मोठा त्रास होत असतो. या वाहनांवर कारवाई करण्यासाठी जळगाव शहर वाहतूक शाखा पुढाकार घेणार का ? जेणेकरून येणाऱ्या जाणाऱ्या नागरिकांना या पार्किंग केलेल्या वाहनांचा त्रास होणार नाही व भविष्यात अपघातात कुणीही जखमी होणार नाही याची देखील काळजी शहर वाहतूक शाखा घेणार का? असा देखील प्रश्न निर्माण झाला आहे
