राज्यात दहीहंडीच्या दिवशी सार्वजनिक सुट्टी जाहीर करण्याच्या सुचना राज्याचे मुख्यमंत्री एकनाथ शिंदे यांनी मुख्य सचिवांना देणार आहेत. तशी माहिती खुद्द एकनाथ शिंदे यांनी दिली. त्यानुसार राज्यात आता दहीहंडीच्या दिवशी सार्वजनिक सुट्टी जाहीर करण्यात येणार आहे. असे मुख्यमंत्री एकनाथ शिंदे यांनी माध्यमांशी बोलतांना सांगितले आहे.
दहीहंडीला सार्वजनिक सुट्टी जाहीर करून दहीहंडीला राष्ट्रीय सण म्हणून मान्यता मिळावी यासाठी महाराष्ट्राचे मुख्यमंत्री मा. @mieknathshinde साहेबांना निवेदन दिले. दहीहंडी हा लोकप्रिय सण असून या दिवशी सार्वजनिक सुट्टी मिळाल्यास सर्वांना उत्सवाचा आनंद लुटता येईल. #dahihandi2022 pic.twitter.com/5rHoLWYA2m
— Pratap Baburao Sarnaik (@PratapSarnaik) July 28, 2022
गोविंदा उत्सव हा महाराष्ट्रातला सर्वात मोठा सण आहे. काही ठिकाणी सार्वजनिक सुट्टी जिल्हाधिकारी जाहीर करतात. पण मी मुख्य सचिवांना सांगून दहीहंडीच्या दिवशी सार्वजनिक सुट्टी जाहीर करण्याचा सुचना देणार असल्याचेही मुख्यमंत्री शिंदे यांनी सांगितले.
शिंदे गटातील आमदार प्रताप सरनाईक यांनी दहीहंडी सणाला राष्ट्रीय सण म्हणून घोषित करुन सार्वजनिक सुट्टी जाहीर करण्याची मागणी सरनाईक यांनी मुख्यमंत्री एकनाथ शिंदे यांच्याकडे केली होती. यंदा १९ ऑगस्ट रोजी दहीहंडी साजरी होणार आहे. या दिवशी सार्वजनिक सुट्टी देण्यात यावी यासाठी सरनाईक यांनी मुख्यमंत्र्यांना पत्र लिहले होते.
प्रताप सरनाईक यांनी केलेल्या मागणीची दखल मुख्यमंत्री एकनाथ शिंदे यांनी घेतली आहे. दहीहंडीला राज्यातील काही ठिकाणी जिल्हाधिकारी सुट्टी जाहीर करतात. मात्र, आता राज्यात सार्वजनिक सुट्टी जाहीर केली जाईल. तसे पत्र सचिवांना देणार असल्याची माहिती शिंदे यांनी दिली आहे. निहार ठाकरे यांनी मुख्यमंत्री एकनाथ शिंदे यांची भेट घेतली. यानंतर प्रसारमाध्यमांशी बोलताना एकनाथ शिंदे यांनी ही घोषणा केली.
