जळगाव मीरर | ८ मार्च २०२६
नवापूर तालुक्यातील खांडबारा रेल्वे स्थानकावर एका माथेफिरू तरुणाने रेल्वेच्या डब्यावर चढून हायव्होल्टेज ओव्हरहेड वीजतारांजवळ धिंगाणा घातल्याची खळबळजनक घटना शुक्रवारी रात्री घडली. या प्रकारामुळे स्थानकावर उपस्थित प्रवाशांमध्ये भीतीचे वातावरण निर्माण झाले असून काही काळ रेल्वे वाहतूकही विस्कळीत झाली.
मिळालेल्या माहितीनुसार, शुक्रवारी रात्री सुमारे १० ते १०.३० वाजेच्या सुमारास भुसावळ–सुरत रेल्वे मार्गावरील खांडबारा स्थानकात ही घटना घडली. स्थानकावर उभ्या असलेल्या एका प्रवासी रेल्वेच्या डब्यावर एक तरुण अचानक चढला. डब्यावर चढल्यानंतर त्याने तिथे इकडून तिकडे धावाधाव करत गोंधळ घालण्यास सुरुवात केली. विशेष म्हणजे, रेल्वेला वीजपुरवठा करणाऱ्या सुमारे २५ हजार व्होल्टच्या जिवंत ओव्हरहेड तारांच्या अगदी जवळून हा तरुण फिरत होता. त्यामुळे मोठा अपघात होण्याची शक्यता निर्माण झाली होती. हा प्रकार लक्षात येताच स्थानकावरील प्रवाशांमध्ये एकच खळबळ उडाली.
घटनेची माहिती मिळताच स्टेशन मास्तर आणि रेल्वे सुरक्षा बलाच्या (RPF) जवानांनी तातडीने घटनास्थळी धाव घेतली. संभाव्य अनर्थ टाळण्यासाठी खबरदारीचा उपाय म्हणून त्या मार्गावरील विद्युत पुरवठा तात्काळ खंडित करण्यात आला. त्यानंतर रेल्वे कर्मचाऱ्यांनी त्या तरुणाला खाली उतरवण्यासाठी वारंवार विनंती केली. मात्र तो कोणाचेही ऐकण्याच्या मनस्थितीत नव्हता. अखेर रेल्वे कर्मचाऱ्यांनी जवळपास अर्धा ते एक तास त्याची समजूत काढल्यानंतर त्याला खाली उतरवण्यात यश आले. तोपर्यंत रेल्वे कर्मचाऱ्यांची मोठी धावपळ झाली होती. या प्रकारामुळे काही काळ रेल्वे मार्गावरील गाड्यांच्या वेळापत्रकावरही परिणाम झाल्याची माहिती समोर आली आहे.
दरम्यान, रेल्वेच्या जिवंत वीजतारांच्या इतक्या जवळ जाणे अत्यंत धोकादायक असते. त्यामुळे नागरिकांनी रेल्वे परिसरात अशा प्रकारचे धोकादायक कृत्य करू नये व सुरक्षिततेचे नियम पाळावेत, असे आवाहन रेल्वे प्रशासनाने केले आहे. घटनेनंतर रेल्वे सुरक्षा बल आणि स्थानिक पोलिसांनी संबंधित तरुणाची चौकशी सुरू केली आहे. तो नेमका कोण आहे आणि त्याने हा प्रकार का केला, याचा तपास सुरू आहे.
