जळगाव मिरर | १० मार्च २०२६
मनसेचा २० वा वर्धापन दिन सोमवार, दि. ९ मार्च रोजी राज्यभर उत्साहात साजरा करण्यात आला. राज ठाकरे यांनी रायगड येथे छत्रपती शिवाजी महाराज यांच्या चरणी नतमस्तक होत वर्धापन दिन साजरा केला. याच पार्श्वभूमीवर जळगाव शहरातील औद्योगिक क्षेत्रातील सुप्रीम कॉलनी परिसरातील पोलीस कॉलनी येथे मनसे शाखेत पक्षाचा वर्धापन दिन जल्लोषात साजरा करण्यात आला.
या वेळी शाखेत फटाके फोडून व पेढे वाटून कार्यकर्त्यांनी आनंदोत्सव साजरा केला. तसेच उद्यापासून या शाखेवर सदस्य नोंदणी अभियानाला सुरुवात करण्यात येणार असल्याची माहिती शाखाध्यक्ष युसुफ खाटीक यांनी दिली. सदस्य नोंदणी कार्यक्रमासाठी शाखेतील सर्व पदाधिकारी उपस्थित राहून अभियानाला प्रारंभ करतील. या निमित्ताने पक्षाचे वरिष्ठ पदाधिकारी देखील शाखेला भेट देणार असल्याचे सांगण्यात आले.
जळगाव शहरासह संपूर्ण जिल्ह्यात होणाऱ्या सदस्य नोंदणी अभियानाला नागरिकांनी उत्स्फूर्त प्रतिसाद द्यावा, असे आवाहन मनसेतर्फे करण्यात आले. विशेषत: शहरातील माता-भगिनी व नागरिकांनी या उपक्रमात सहभागी व्हावे, असे आवाहन कार्यकर्त्यांनी केले.
वर्धापन दिनानिमित्त आयोजित कार्यक्रमास उपमहानगराध्यक्ष श्रीकृष्ण मेंगडे, उपमहानगराध्यक्ष ललित शर्मा, विभाग अध्यक्ष राहुल चव्हाण, शाखाध्यक्ष युसुफ खाटीक, अशपाक शहा, बादशाहा शहा, दीपक माळी, मुज्जू बिस्ती, अली खाटीक, सोहेल पिंजारी, शोएब खाटीक, प्रदीप गायकवाड यांच्यासह अनेक पदाधिकारी व कार्यकर्ते उपस्थित होते.
