नगरसेविका रिटा सपकाळे यांच्या पुढाकाराने कामाला सुरुवात !
जळगाव मिरर | १० मार्च २०२६
शहरातील प्रभाग क्रमांक १ मधील गेंदालाल मिल परिसरात गेल्या अनेक वर्षांपासून साचलेल्या गटारीतील घाणीमुळे नागरिकांना मोठा त्रास सहन करावा लागत होता. अखेर नवनिर्वाचित नगरसेविका रिटा विनोद सपकाळे व दिलीप पोकळे यांच्या पुढाकाराने या परिसरात गटारी स्वच्छतेची मोठी मोहीम हाती घेण्यात आली असून मंगळवारी या कामाची सुरुवात करण्यात आली.
महापालिकेच्या सुमारे ५० कर्मचाऱ्यांच्या पथकाच्या माध्यमातून या परिसरातील प्रत्येक गल्लीतील गटारीतील साचलेली घाण काढण्याचे काम हाती घेण्यात आले आहे. ही स्वच्छता मोहीम दि. १० मार्च ते १२ मार्च दरम्यान तीन दिवस चालणार असून अनेक वर्षांपासून साचलेली घाण बाहेर काढून परिसर स्वच्छ करण्याचे नियोजन करण्यात आले आहे.
या उपक्रमामुळे परिसरातील स्वच्छतेत मोठी सुधारणा होण्यासोबतच नागरिकांच्या आरोग्याच्या दृष्टीनेही लाभ होणार असल्याची भावना स्थानिक नागरिकांनी व्यक्त केली. अनेक वर्षांनंतर गटारींची साफसफाई होत असल्याने रहिवाशांमध्ये समाधानाचे वातावरण आहे.
या वेळी नगरसेविका रिटा सपकाळे यांचे पती विनोद सपकाळे तसेच दिलीप पोकळे यांचे प्रतिनिधी नवल सपकाळे यांनी स्वच्छता मोहिमेची पाहणी करत कर्मचाऱ्यांना आवश्यक त्या सूचना दिल्या. त्यांनी परिसरातील सर्व गटारी स्वच्छ करून नागरिकांना स्वच्छ व निरोगी वातावरण उपलब्ध करून देण्याचा प्रयत्न असल्याचे सांगितले.
