जळगाव मिरर | ३१ मार्च २०२६
जळगाव महानगरपालिकेची पहिली महासभा नेहमीप्रमाणेच चर्चेचा आणि वादाचा केंद्रबिंदू ठरली. या महासभेत शहरात शिस्त प्रस्थापित करण्यासाठी महापौर दीपमाला काळे यांनी आक्रमक भूमिका घेत तब्बल १० महत्त्वपूर्ण सुधारणा प्रस्तावित केल्या. मात्र, दुसरीकडे सभागृहात एका नगरसेवकाने ‘झगा मगा मला बघा’ या संकल्पनेतून चक्क ‘रीलस्टार’ला बोलावल्याची घटना समोर आल्याने वातावरणात वेगळीच खळबळ उडाली.
महापौरांनी सादर केलेल्या प्रस्तावांमध्ये शहर स्वच्छतेसाठी अनधिकृतपणे कचरा टाकणाऱ्यांवर दंडात्मक कारवाई, पाळीव प्राण्यांच्या नोंदणी व परवाना प्रणाली, तसेच नागरी शिस्तीशी संबंधित विविध धोरणात्मक निर्णयांचा समावेश आहे. शहरातील वाढत्या अस्वच्छतेवर नियंत्रण मिळवण्यासाठी आणि नागरिकांमध्ये शिस्त रुजवण्यासाठी हे निर्णय महत्त्वाचे मानले जात आहेत.
दरम्यान, सभागृहात स्वपक्षीय नगरसेवकांनी आपल्या प्रभागातील समस्या मांडत प्रशासनाचे लक्ष वेधले. रस्ते, पाणीपुरवठा, स्वच्छता आदी मूलभूत प्रश्नांवर चर्चा झाली. मात्र, याचवेळी एका नगरसेवकाने आपल्या कामाचा प्रचार करण्यासाठी ‘रीलस्टार’ला सभागृहात पाचारण केल्याची बाब उघड झाल्याने सभागृहाच्या गांभीर्यावर प्रश्नचिन्ह उपस्थित झाले.
विशेष म्हणजे, सभागृहात प्रवेशासाठी महापौरांनी पास सक्तीचे केले असतानाही काही नगरसेवकांनी या नियमांकडे दुर्लक्ष केल्याची चर्चा रंगली. स्वपक्षीय नगरसेवकच महापौरांच्या आदेशाचे पालन करत नसतील, तर अधिकारी, कर्मचारी आणि नागरिकांनी कोणाचा आदेश मानायचा, असा सवालही दबक्या आवाजात उपस्थित केला जात होता.
जळगाव मनपाची सभा नेहमीच वादळी ठरत असली तरी यावेळी शिस्तीच्या निर्णयांबरोबरच ‘रीलस्टार’ प्रकरणामुळे वेगळ्याच कारणाने चर्चेत राहिली. शहराच्या विकासासाठी घेतलेल्या निर्णयांची अंमलबजावणी कितपत प्रभावीपणे होते, याकडे आता सर्वांचे लक्ष लागले आहे.
