जळगाव मिरर | ३ एप्रिल २०२६
बीड जिल्ह्यात गाजलेल्या हत्येच्या प्रयत्नाच्या प्रकरणात महत्त्वाचा निकाल देत न्यायालयाने सतीश उर्फ ‘खोक्या’ भोसले याला निर्दोष मुक्त केले आहे. तब्बल वर्षभर कारागृहात राहिल्यानंतर त्याची सुटका झाल्याने जिल्ह्यात या निर्णयाची जोरदार चर्चा सुरू झाली आहे. न्यायालयाच्या या निर्णयामुळे भोसलेला मोठा दिलासा मिळाला असून, कारागृहातून बाहेर आल्यानंतर त्याने “न्याय देवतेने मला न्याय दिला,” अशी भावना व्यक्त केली.
सुमारे वर्षभरापूर्वी भोसले याच्यावर ढाकणे पिता-पुत्रावर हल्ला करून त्यांचा खून करण्याचा प्रयत्न केल्याचा गंभीर गुन्हा दाखल करण्यात आला होता. या घटनेनंतर पोलिसांनी त्याला अटक करून छत्रपती संभाजीनगर येथील कारागृहात ठेवले होते. प्रकरणाची दीर्घ सुनावणी झाल्यानंतर न्यायालयाने उपलब्ध पुराव्यांच्या आधारे भोसले याच्याविरोधातील आरोप सिद्ध न झाल्याचे नमूद करत त्याची निर्दोष मुक्तता केली. न्यायालयाचा निकाल लागल्यानंतर काल त्याची अधिकृत सुटका करण्यात आली आणि आज तो कारागृहाबाहेर आला.
दरम्यान, भोसले याच्याशी संबंधित आणखी एक प्रकरणही चर्चेत आहे. काही महिन्यांपूर्वी एका व्यक्तीला बॅटने मारहाण केल्याचा त्याचा व्हिडिओ सोशल मीडियावर व्हायरल झाला होता. या घटनेप्रकरणी त्याच्यावर स्वतंत्र गुन्हा दाखल असून तो सध्या न्यायप्रविष्ट आहे. या प्रकरणात त्याला जामीन मिळालेला असला तरी न्यायालयीन प्रक्रिया सुरूच आहे. त्यामुळे हत्येच्या प्रयत्नाच्या आरोपातून मुक्तता मिळाल्यानंतरही भोसलेच्या अडचणी पूर्णपणे संपलेल्या नाहीत.
न्यायालयाच्या निर्णयानंतर माध्यमांशी संवाद साधताना भोसलेने गंभीर आरोप केले. “मला जाणीवपूर्वक संपवण्याचा प्रयत्न करण्यात आला. एका नेत्याला लक्ष्य करण्यासाठी आदिवासी समाजातील मला टार्गेट करण्यात आले,” असा दावा त्याने केला. पुढे बोलताना त्याने आपल्या कुटुंबावर तीन वेळा हल्ले झाल्याचा आरोपही केला. “आयुष्यभराची कमाई लावून उभारलेलं घर पाडण्यात आलं. गेल्या एका वर्षात माझ्या कुटुंबाने प्रचंड हाल सहन केले,” असेही तो म्हणाला.
जिल्ह्यातील जातीयवाद आणि राजकीय वैमनस्यामुळे काही लोक वातावरण बिघडवत असल्याचा आरोप करत भोसलेने या प्रकरणाला वेगळे वळण दिले आहे. एकीकडे न्यायालयीन निर्णयामुळे त्याला दिलासा मिळाला असला, तरी दुसरीकडे त्याच्या वक्तव्यांमुळे बीडमध्ये पुन्हा एकदा राजकीय आणि सामाजिक चर्चांना उधाण आले आहे.
