मुक्ताईनगर प्रतिनिधी | प्रणित काठोके
देशभरातील औषध विक्रेत्यांच्या विविध प्रलंबित मागण्या, ऑनलाईन औषध विक्रीला विरोध, कॉर्पोरेट कंपन्यांची मनमानी तसेच बनावट औषधांच्या वाढत्या धोक्याच्या निषेधार्थ दि. 20 मे 2026 रोजी देशव्यापी “ऑल इंडिया केमिस्ट्स बंद” चे आयोजन करण्यात आले आहे. या बंदला समर्थन दर्शवत मुक्ताईनगर तालुक्यातील सर्व औषध विक्रेते स्वयंस्फूर्तीने सहभागी होणार असल्याची माहिती मुक्ताईनगर तालुका केमिस्ट अँड ड्रगिस्ट असोसिएशनच्या वतीने देण्यात आली आहे.
याबाबत माननीय तहसीलदार साहेब, मुक्ताईनगर तसेच पोलीस निरीक्षक साहेब, मुक्ताईनगर यांना निवेदन देण्यात आले आहे. सदर बंद शांततामय व लोकशाही मार्गाने करण्यात येणार असल्याचे संघटनेने स्पष्ट केले आहे.
बंदच्या दिवशी तालुक्यातील सर्व मेडिकल दुकाने बंद राहणार असली तरी रुग्णांची गैरसोय होऊ नये यासाठी फक्त आपत्कालीन सेवेसाठी आवश्यक औषधे उपलब्ध करून देण्यात येणार असल्याचेही असोसिएशनच्या वतीने सांगण्यात आले आहे. प्रशासनाने सहकार्य करावे, अशी विनंतीही निवेदनाद्वारे करण्यात आली आहे.
