जळगाव मिरर | २३ मे २०२६
लग्नाच्या अवघ्या २१ दिवसांत संसार मोडल्यानंतर आणि आई-वडिलांच्या निधनामुळे गेल्या पाच वर्षांपासून एकटी राहत असलेल्या ४० वर्षीय महिलेचा मृतदेह शुक्रवारी सकाळी तिच्या फ्लॅटमध्ये कुजलेल्या अवस्थेत आढळून आल्याने परिसरात खळबळ उडाली. ही घटना शहरातील रिंगरोडवरील महेश प्रगती मंगल कार्यालयामागील वृंदावन अपार्टमेंटमध्ये उघडकीस आली. प्रिया दिलीप जैन (वय ४०) असे मृत महिलेचे नाव असून त्या गेल्या काही वर्षांपासून अपार्टमेंटमधील फ्लॅटमध्ये एकट्याच राहत होत्या.
मिळालेल्या माहितीनुसार, गेल्या चार-पाच दिवसांपासून प्रिया जैन कोणालाही दिसत नव्हत्या. शुक्रवारी सकाळी परिसरातील रहिवाशांना त्यांच्या फ्लॅटमधून दुर्गंधी येत असल्याचे जाणवले. याबाबत शेजाऱ्यांनी सकाळी साडेआठच्या सुमारास त्यांच्या काकू निशा जैन (श्रीश्रीमाळ) यांना माहिती दिली. त्यानंतर त्या सकाळी दहाच्या सुमारास वृंदावन अपार्टमेंटमध्ये दाखल झाल्या. घराचा दरवाजा बंद असल्याने तो तोडण्यात आला. दरवाजा उघडल्यानंतर प्रिया जैन या बेडवर मृतावस्थेत पडलेल्या आढळून आल्या. त्यांचा मृतदेह कुजलेल्या अवस्थेत असल्याचे निदर्शनास आले. घटनेची माहिती मिळताच संबंधित यंत्रणा घटनास्थळी दाखल झाली. त्यानंतर शववाहिकेद्वारे मृतदेह शासकीय वैद्यकीय महाविद्यालय व रुग्णालयात (जीएमसी) हलविण्यात आला. तेथे डॉ. अक्षय लाळगे यांनी तपासणी केली. या प्रकरणी जिल्हापेठ पोलीस ठाण्यात अकस्मात मृत्यूची नोंद करण्यात आली असून पुढील तपास रुस्तम तडवी करीत आहेत.
दरम्यान, प्रिया जैन यांचा २०१४ मध्ये विवाह झाला होता. मात्र, लग्नाच्या अवघ्या २१ दिवसांतच त्या पतीपासून विभक्त झाल्या होत्या. त्यानंतर त्या अभ्यासवर्ग क्लासेसचे संचालक असलेल्या वडील दिलीप जैन यांच्या घरी माहेरी राहत होत्या. २०१९ मध्ये वडिलांचे तर २०२१ मध्ये आईचे निधन झाल्यानंतर त्या पूर्णपणे एकट्या राहत असल्याची माहिती समोर आली आहे. या घटनेमुळे परिसरात हळहळ व्यक्त केली जात आहे.
