जळगाव मिरर | २९ मे २०२६
मावशीच्या मदतीला जात असलेल्या २५ वर्षीय तरुणीला जबरदस्तीने मोटारसायकलवर बसवून तिचे फोटो काढणे, त्यानंतर घरात घुसून लग्नासाठी दबाव टाकत फोटो व्हायरल करण्याची धमकी देऊन विनयभंग केल्याची धक्कादायक घटना शहरात उघडकीस आली आहे. ही घटना दि. २७ मे रोजी सकाळी साडेअकरा वाजेच्या सुमारास घडली. याप्रकरणी शनिपेठ पोलिसांत संशयित सागर महाले (वय २८, रा. सकरनगर, समता स्कूलजवळ, मु.पो. धुळे, ह.मु. नाशिक) याच्याविरुद्ध गुन्हा दाखल करण्यात आला आहे.
पोलिसांकडून मिळालेल्या माहितीनुसार, शहरातील एका भागात २५ वर्षीय तरुणी वास्तव्यास आहे. दि. २७ मे रोजी सकाळी ती आपल्या मावशीच्या मदतीसाठी जात असताना संशयित सागर महाले याने तिचा पाठलाग करत तिला अडविले. यानंतर तिला जबरदस्तीने मोटारसायकलवर बसवून तिचे फोटो काढल्याचा आरोप आहे. त्यानंतर संशयिताने तरुणी राहत असलेल्या घरात घुसून तिच्यावर लग्नासाठी दबाव टाकला. तसेच, लग्नास नकार दिल्यास काढलेले फोटो व्हायरल करण्याची धमकी दिली. यावेळी तरुणीचा विनयभंग केल्याचाही आरोप करण्यात आला आहे.
घटनेनंतर घाबरलेल्या तरुणीने तातडीने शनिपेठ पोलीस ठाणे गाठून तक्रार दाखल केली. पीडितेच्या तक्रारीवरून संशयित सागर भरत महाले याच्याविरुद्ध संबंधित कलमान्वये गुन्हा दाखल करण्यात आला असून पुढील तपास शनिपेठ पोलीस करीत आहेत.
