जळगाव मिरर | १६ जून २०२६
जळगाव स्थानिक प्राधिकरण मतदारसंघाच्या विधान परिषद निवडणुकीच्या पार्श्वभूमीवर भारतीय जनता पक्षाच्या नगरसेवकांची महत्त्वपूर्ण बैठक आज उत्साहपूर्ण वातावरणात पार पडली. महायुतीचे अधिकृत उमेदवार नंदकिशोर महाजन यांच्या विजयासाठी निवडणूक रणनीती, मतदान प्रक्रिया तसेच विविध संघटनात्मक बाबींवर या बैठकीत सविस्तर चर्चा करण्यात आली.
बैठकीस आमदार राजुमामा भोळे, आमदार मंगेश चव्हाण, महापौर दीपमाला काळे, भाजपाचे महानगर जिल्हाध्यक्ष दीपक सूर्यवंशी, माजी जिल्हाध्यक्ष चंद्रकांत बाविस्कर, पश्चिम जिल्हाध्यक्ष डॉ. राधेश्याम चौधरी, गटनेते प्रकाश बालाणी, स्थायी समितीचे सभापती डॉ. चंद्रशेखर पाटील, सभागृह नेते नितीन लढ्ढा, विशाल त्रिपाठी यांच्यासह भाजपाचे सर्व नगरसेवक उपस्थित होते.
यावेळी उपस्थित मान्यवरांनी स्थानिक स्वराज्य संस्थांमधील महायुतीची ताकद, राज्य शासनाच्या विविध विकासकामांचा आढावा तसेच मुख्यमंत्री देवेंद्र फडणवीस यांच्या नेतृत्वाखाली होत असलेल्या विकासकामांची माहिती देत नगरसेवकांना मार्गदर्शन केले. स्थानिक प्राधिकरण मतदारसंघाच्या निवडणुकीत महायुतीचे उमेदवार नंदकिशोर महाजन यांना मोठ्या मताधिक्याने विजयी करण्यासाठी सर्वांनी समन्वयाने आणि संघटितपणे काम करण्याचे आवाहन करण्यात आले.
बैठकीत मतदान प्रक्रियेबाबत निवडणूक आयोगाच्या नियमांची सविस्तर माहिती देण्यात आली. मतदान करताना घ्यावयाची काळजी, मत वैध राहण्यासाठी आवश्यक बाबी तसेच निवडणूक प्रक्रियेतील तांत्रिक मुद्द्यांवर मार्गदर्शन करण्यात आले. नगरसेवकांनी उपस्थित केलेल्या विविध प्रश्नांनाही यावेळी उत्तरे देण्यात आली.
महायुतीच्या सर्व घटक पक्षांमध्ये उत्तम समन्वय असून या निवडणुकीत महायुतीचे उमेदवार नंदकिशोर महाजन यांचा विजय निश्चित असल्याचा विश्वास उपस्थित नेत्यांनी व्यक्त केला. जळगाव जिल्ह्यातील स्थानिक स्वराज्य संस्थांमध्ये महायुतीला मिळत असलेला वाढता पाठिंबा, कार्यकर्त्यांमधील उत्साह आणि संघटनात्मक ताकद पाहता ही निवडणूक एकतर्फी ठरेल, असे मतही यावेळी मांडण्यात आले.
बैठकीत उपस्थित नगरसेवकांनी महायुतीच्या उमेदवाराच्या विजयासाठी पूर्ण क्षमतेने काम करण्याचा निर्धार व्यक्त केला. एकजूट, पक्षशिस्त आणि विकासाच्या मुद्द्यावर ही निवडणूक लढविली जात असून नंदकिशोर महाजन यांना विक्रमी मताधिक्य मिळवून देण्यासाठी सर्वांनी प्रयत्न करावेत, असे आवाहनही करण्यात आले. या बैठकीमुळे भाजप नगरसेवकांमध्ये नवचैतन्य निर्माण झाले असून महायुतीच्या विजयाचा मार्ग अधिक सुकर झाल्याची भावना उपस्थितांमधून व्यक्त करण्यात आली.
