जळगाव मिरर | २३ जून २०२६
धरणगाव तालुक्यातील सावदा-रिंगणगाव रस्त्यावर पाळधीजवळ सोमवारी दुपारी झालेल्या भीषण अपघातात दोन दुचाकींची समोरासमोर जोरदार धडक होऊन तिघांचा जागीच मृत्यू झाला. या दुर्घटनेत आणखी एक जण गंभीर जखमी झाला असून त्याच्यावर उपचार सुरू आहेत. अचानक घडलेल्या या दुर्घटनेमुळे परिसरात हळहळ व्यक्त होत आहे.
या अपघातात किरण बाबूलाल राक्षे-मराठे (वय ३८, रा. पथराड, ता. धरणगाव), चेतन पाटील (वय ३५, रा. वाडेगुडे, ता. भडगाव) आणि प्रदीप उखा निकम (वय ४०, रा. गोंदेगाव-निंभोरा, ता. सोयगाव, जि. छत्रपती संभाजीनगर) यांचा मृत्यू झाला आहे. तर बाबूलाल राक्षे हे गंभीर जखमी झाले आहेत.
मिळालेल्या माहितीनुसार, किरण राक्षे हे पद्मालय येथे एका लग्नसमारंभासाठी गेले होते. समारंभ आटोपून ते आपल्या दुचाकीने परतत असताना त्यांच्या दुचाकीवर वडील बाबूलाल राक्षे मागे बसले होते. दरम्यान, पाळधीजवळ समोरून येणाऱ्या दुसऱ्या दुचाकीची त्यांच्या दुचाकीला जोरदार धडक बसली. धडक इतकी भीषण होती की दोन्ही दुचाकींचा चक्काचूर झाला आणि चारही जण गंभीर जखमी झाले.
अपघात होताच परिसरातील नागरिकांनी घटनास्थळी धाव घेत मदतकार्य सुरू केले. जखमींना तातडीने जिल्हा शासकीय रुग्णालयात दाखल करण्यात आले. मात्र डॉक्टरांनी तपासणीनंतर किरण राक्षे, चेतन पाटील आणि प्रदीप निकम यांना मृत घोषित केले. तर बाबूलाल राक्षे यांच्यावर उपचार सुरू असून त्यांची प्रकृती गंभीर असल्याचे सांगण्यात आले.
घटनेची माहिती मिळताच पोलिसांनी घटनास्थळी धाव घेत पंचनामा केला. या प्रकरणी रामानंदनगर पोलिस ठाण्यात झिरो क्रमांकाने नोंद करण्यात आली असून पुढील तपासासाठी प्रकरण पाळधी आऊटपोस्टकडे वर्ग करण्यात आले आहे. अपघाताचे नेमके कारण शोधण्याचे काम पोलिसांकडून सुरू आहे.
दरम्यान, या दुर्घटनेमुळे तीन कुटुंबांवर दुःखाचा डोंगर कोसळला आहे. किरण राक्षे हे वेल्डिंग व्यवसाय करून आपल्या कुटुंबाचा उदरनिर्वाह करीत होते. त्यांच्या पश्चात पत्नी, मुलगा, मुलगी, आई-वडील, भाऊ आणि बहीण असा मोठा परिवार आहे. तर चेतन पाटील हा आपल्या कुटुंबातील एकुलता एक मुलगा होता. त्याच्या पश्चात आई-वडील आणि पत्नी असा परिवार आहे. अपघातातील मृत्यूची बातमी समजताच नातेवाईकांनी रुग्णालयात एकच आक्रोश केला.
या भीषण अपघातामुळे पाळधीसह परिसरात शोककळा पसरली असून भरधाव वाहनांवर नियंत्रण आणण्यासाठी प्रशासनाने कठोर उपाययोजना कराव्यात, अशी मागणी नागरिकांकडून होत आहे.
