जळगाव मिरर | २ जुलै २०२६
राष्ट्रीय डॉक्टर दिनानिमित्त सिव्हिल हॉस्पिटल परिसरात सेवाभावी डॉक्टरांचा सन्मान सोहळा उत्साहात पार पडला. या प्रसंगी रुग्णांच्या सेवेसाठी अहोरात्र कार्यरत असलेल्या डॉ. डी. एन. ठाकूर तसेच शासकीय वैद्यकीय महाविद्यालयातील डॉक्टरांचा शाल, पुष्पगुच्छ व सन्मानचिन्ह देऊन गौरव करण्यात आला.
यावेळी उपस्थित मान्यवरांनी डॉक्टरांचे समाजातील योगदान अधोरेखित करत, “रुग्णांच्या आरोग्यासाठी स्वतःचा वेळ, कुटुंब आणि वैयक्तिक सुखाचा त्याग करून सेवा देणाऱ्या डॉक्टरांचा सन्मान हा समाजाचे कर्तव्य आहे,” असे मत व्यक्त केले. कोरोनाकाळापासून आजपर्यंत डॉक्टरांनी दिलेल्या निस्वार्थ सेवेमुळे समाजात त्यांच्याबद्दलचा आदर अधिक दृढ झाल्याचेही यावेळी नमूद करण्यात आले.
या सत्कार सोहळ्याला आरोग्य संजू अहिरे, पप्पू जगताप, कु. किरण कापडणे, वेदांत एज्युकेशनच्या संचालिका हर्षाली ढाके तसेच जन्मत प्रतिष्ठानचे अध्यक्ष पंकज नाले यांची प्रमुख उपस्थिती होती. उपस्थितांनी डॉक्टरांना डॉक्टर दिनाच्या शुभेच्छा देत त्यांच्या कार्याचा गौरव केला.
कार्यक्रमाचे वातावरण अत्यंत उत्साहपूर्ण व प्रेरणादायी होते. उपस्थितांनी डॉक्टरांच्या सेवाभावाला सलाम करत भविष्यातही समाजहितासाठी अशीच निष्ठेने सेवा सुरू ठेवण्याच्या शुभेच्छा दिल्या. डॉक्टरांच्या कार्याबद्दल कृतज्ञता व्यक्त करत कार्यक्रमाची सांगता करण्यात आली.
