जळगाव मिरर | २३ सप्टेंबर २०२६
भुसावळ शहरातून जाणाऱ्या राष्ट्रीय महामार्ग क्रमांक ५३ वर मंगळवारी दुपारी काळजाचा थरकाप उडविणारा भीषण अपघात झाला. दीपनगर उड्डाणपुलाजवळ वरणगावकडून भुसावळच्या दिशेने येणाऱ्या टिव्हीएस मोपेडला मागून आलेल्या भरधाव ट्रकने जोरदार धडक दिली. धडक इतकी भीषण होती की मोपेड ट्रकच्या पुढील भागात अडकली आणि ट्रकने ती दीपनगर उड्डाणपुलापासून दोन किलो मिटर शेरे पंजाब हॉटेलजवळपर्यंत फरफटत नेल्याची धक्कादायक माहिती समोर आली आहे.
या दुर्घटनेत देवेन चौधरी आणि सलीम मिर्जा बेग या दोघांचा दुर्दैवी मृत्यू झाला. मंगळवारी दुपारी सुमारे तीन वाजण्याच्या सुमारास हा अपघात घडला. प्राथमिक माहितीनुसार, दोन्ही वरणगाव येथून भुसावळच्या दिशेने टिव्हीएस मोपेडवरून येत होते. याचवेळी मागून आलेल्या ट्रकने त्यांच्या मोपेडला जोरदार धडक दिली. धडकेनंतर मोपेड ट्रकच्या पुढील भागात अडकल्याने काही अंतरापर्यंत रस्त्यावरून फरफटत गेली. या घटनेमुळे महामार्गावर काही काळ एकच खळबळ उडाली.
या भीषण अपघातात देवेन चौधरी यांचा जागीच मृत्यू झाला. तर गंभीर जखमी झालेल्या सलीम मिर्जा बेग यांचाही उपचारादरम्यान मृत्यू झाला. दोघे रेलवे ठेकेदारीत काम करीत असल्याचे समजते, दोन्ही मृतदेह पुढील कार्यवाहीसाठी शासकीय रुग्णालयात हलविण्यात आले.अपघाताच्या वेळी योगायोगाने याच मार्गावरून आरटीओ विभागातील पोलीस कर्मचारी जात होते. त्यांच्या निदर्शनास अपघाताची घटना येताच त्यांनी तत्काळ मदतकार्य सुरू केले तसेच संबंधित यंत्रणेला माहिती दिली. त्यानंतर रुग्णवाहिका घटनास्थळी दाखल झाली. गंभीर अवस्थेतील जखमीला तातडीने रुग्णालयात हलविण्यात आले; मात्र उपचारादरम्यान त्याचाही मृत्यू झाला. अपघातानंतर ट्रकचालक घटनास्थळी न थांबता ट्रक घेऊन पुढे निघून गेल्याची प्राथमिक माहिती आहे. मात्र, पोलिसांनी तत्परतेने शोध घेत संबंधित ट्रक व चालकाला नशिराबाद टोलनाक्याजवळ पकडल्याचे सांगण्यात येत आहे. याबाबत अधिकृत तपशील पोलिस तपासानंतर स्पष्ट होणार आहे.
नेहमीप्रमाणे घराबाहेर पडलेले दोन तरुण पुन्हा घरी परतलेच नाहीत. या एका अपघाताने दोन कुटुंबांवर दुःखाचा डोंगर कोसळला आहे. मिळालेल्या माहितीनुसार, देवेन चौधरी, सलीम मिर्जा बेग दोघे रेल्वे ठेकेदारीच्या कामाला होते. दोघेही भुसावळ येथील रहिवासी असल्याची प्राथमिक माहिती आहे. काही क्षणांत घडलेल्या या दुर्घटनेने दोन कुटुंबांचा आधार हिरावला असून परिसरात हळहळ व्यक्त होत आहे.
