जळगाव मिरर | ९ जुलै २०२६
कल्याण-डोंबिवली महानगरपालिकेच्या शास्त्रीनगर रुग्णालयात कर्तव्य बजावत असलेल्या महिला निवासी डॉक्टर आणि आरोग्य कर्मचाऱ्यांवर झालेल्या हिंसक हल्ल्याच्या निषेधार्थ महाराष्ट्र असोसिएशन ऑफ रेसिडेंट डॉक्टर्स (MARD) च्या राज्यव्यापी आंदोलनाला जळगावातून उत्स्फूर्त प्रतिसाद मिळाला. शासकीय वैद्यकीय महाविद्यालय व रुग्णालय (GMC), जळगाव येथील निवासी डॉक्टरांनी गुरुवारी काळ्या फिती बांधून शांततापूर्ण आंदोलन करत घटनेचा तीव्र निषेध नोंदविला.
या आंदोलनाद्वारे डॉक्टरांनी वैद्यकीय क्षेत्रात दिवसेंदिवस वाढत असलेल्या हिंसाचाराविषयी गंभीर चिंता व्यक्त केली. रुग्णसेवा अखंडित सुरू ठेवत आंदोलन करण्याचा निर्णय घेत, समाजाप्रती आपली जबाबदारी जपत निषेध व्यक्त करण्यात आला. डॉक्टरांवर होणारे हल्ले थांबविण्यासाठी सरकारने प्रभावी आणि कठोर उपाययोजना कराव्यात, तसेच आरोग्य कर्मचाऱ्यांना सुरक्षित आणि भयमुक्त कार्यस्थळ उपलब्ध करून द्यावे, अशी ठाम मागणी करण्यात आली.
आंदोलनाला शासकीय वैद्यकीय महाविद्यालयाचे अधिष्ठाता डॉ. गिरीश ठाकूर तसेच वैद्यकीय अधीक्षक डॉ. योगिता बाविस्कर यांनी काळ्या फिती बांधून जाहीर पाठिंबा दिला. डॉक्टरांच्या सुरक्षिततेचा प्रश्न अत्यंत गंभीर असून आरोग्यसेवा देणाऱ्या प्रत्येक डॉक्टर, निवासी डॉक्टर, परिचारिका आणि आरोग्य कर्मचाऱ्यांना सुरक्षित वातावरण मिळणे ही शासनाची जबाबदारी असल्याचे त्यांनी यावेळी अधोरेखित केले.
MARD च्या पदाधिकाऱ्यांनी सांगितले की, रुग्ण आणि त्यांच्या नातेवाईकांच्या सेवेसाठी डॉक्टर दिवस-रात्र कार्यरत असतात. अशा परिस्थितीत डॉक्टरांवर होणारे हल्ले केवळ वैद्यकीय क्षेत्रासाठी नव्हे, तर संपूर्ण आरोग्य व्यवस्थेसाठी धोकादायक आहेत. अशा घटना रोखण्यासाठी रुग्णालयांमध्ये सक्षम सुरक्षा व्यवस्था, कायद्याची कठोर अंमलबजावणी आणि दोषींवर तातडीने कारवाई होणे आवश्यक आहे.
यावेळी निवासी डॉक्टरांनी शासनाकडे डॉक्टरांच्या सुरक्षेसंदर्भातील विद्यमान कायद्यांची प्रभावी अंमलबजावणी करण्याची मागणी केली. तसेच भविष्यात अशा प्रकारच्या घटना टाळण्यासाठी सर्व शासकीय आणि खासगी रुग्णालयांमध्ये आवश्यक सुरक्षा उपाय तातडीने राबविण्याचे आवाहनही करण्यात आले.
या आंदोलनामुळे जळगावातील वैद्यकीय क्षेत्रातून डॉक्टरांच्या सुरक्षिततेचा मुद्दा पुन्हा एकदा ऐरणीवर आला असून, राज्यभरातील निवासी डॉक्टरांनी व्यक्त केलेल्या एकजुटीचेही दर्शन घडले.
