जळगाव मिरर | २८ जुलै २०२६
महाराष्ट्र राज्यात सुरू असलेल्या मतदार यादी विशेष संक्षिप्त पुनरीक्षण (SIR) कार्यक्रमांतर्गत उत्कृष्ट कामगिरी करणारे मतदान केंद्रस्तरीय अधिकारी (बीएलओ) प्रभाकर खराटे यांचा जळगाव शहर निवडणूक शाखेतर्फे सत्कार करण्यात आला. हरिविठ्ठल नगर परिसरातील यादी भाग क्रमांक १६९ मधील मतदारांचे १०० टक्के मॅपिंग यशस्वीरीत्या पूर्ण केल्याबद्दल त्यांना पुष्पगुच्छ व प्रशस्तीपत्र देऊन गौरविण्यात आले.
निवडणूक आयोगाच्या निर्देशानुसार राज्यभर मतदार यादी विशेष संक्षिप्त पुनरीक्षण कार्यक्रम राबविण्यात येत असून, या मोहिमेत सन २००२ च्या मतदार यादीशी विद्यमान मतदारांची पडताळणी (मॅपिंग), मतदार यादीचे शुद्धीकरण तसेच अचूक व अद्ययावत मतदार यादी तयार करण्याचे काम सुरू आहे.
या पार्श्वभूमीवर हरिविठ्ठल नगर येथील यादी भाग क्रमांक १६९ चे मतदान केंद्रस्तरीय अधिकारी प्रभाकर खराटे यांनी परिसरात घरोघरी भेटी देत नागरिकांशी प्रत्यक्ष संपर्क साधला. तसेच विविध ठिकाणी विशेष शिबिरे आयोजित करून मतदारांची माहिती पडताळून १०० टक्के मॅपिंगचे उद्दिष्ट पूर्ण केले.
त्यांच्या या उल्लेखनीय कार्याची दखल घेत मतदार नोंदणी अधिकारी तथा उपविभागीय अधिकारी विनय गोसावी, निवडणूक नायब तहसीलदार नवीन भावसार तसेच सहायक मतदार नोंदणी अधिकारी तथा तहसीलदार (राजशिष्टाचार) रूपाली काळे यांच्या हस्ते प्रभाकर खराटे यांना पुष्पगुच्छ व प्रशस्तीपत्र देऊन सन्मानित करण्यात आले.
यावेळी सहाय्यक मतदार नोंदणी अधिकारी तथा प्रशासन अधिकारी, मनपा शिक्षण मंडळ खलील शेख तसेच पर्यवेक्षक योगेश भालेराव यांचे मार्गदर्शन लाभल्याचा उल्लेख करण्यात आला. मतदार यादी अधिक अचूक, पारदर्शक आणि अद्ययावत करण्यासाठी मतदान केंद्रस्तरीय अधिकाऱ्यांची भूमिका अत्यंत महत्त्वाची असून, प्रभाकर खराटे यांनी केलेले शंभर टक्के मॅपिंगचे कार्य इतर बीएलओंसाठी प्रेरणादायी असल्याची भावना उपस्थित अधिकाऱ्यांनी व्यक्त केली.
