जळगाव मिरर | ३० जुलै २०२६
भडगाव ते चाळीसगाव महामार्गावरील तांदुळवाडी फाट्याजवळ मंगळवारी सायंकाळी भरधाव ट्रकने दुचाकीला मागून जबर धडक दिल्याने युवकाचा जागीच दुर्दैवी मृत्यू झाला, तर अन्य एक युवक गंभीर जखमी झाला.
मिळालेल्या माहितीनुसार, तांदुळवाडी फाट्याजवळ २८ जुलैला सायंकाळी ६.३० वाजेच्या सुमारास हा अपघात झाला. प्रत्यक्षदर्शी आणि पोलिसांच्या माहितीनुसार, आयशर ट्रक (एमळच – ५४, ०१३१) घेवून चालक अरबाज शाफिक मन्यार (रा. यशवंत नगर, भडगाव) हा जात होता. तांदुळवाडी फाट्याजवळ या ट्रकने समोर जाणाऱ्या दुचाकीला (एमएच- १९, डीयू ४१९५) ला पाठीमागून भीषण धडक दिली. या अपघातात दुचाकीवर पाठीमागे बसलेले धनराज भगवान निकुंभ (रा. घुसर्डी, ता. पाचोरा) यांचा गंभीर इजा झाल्यामुळे जागीच मृत्यू झाला. तर दुचाकी चालवणारे प्रशांत पंडित एरंडे हे गंभीर जखमी झाले आहेत. अपघातानंतर स्थानिकांनी तातडीने मदतीसाठी धाव घेतली.
प्रशांत एरंडे यांच्यावर भडगाव येथे प्राथमिक उपचार करून पुढील उपचारासाठी त्यांना चाळीसगावातील रुग्णालयात दाखल करण्यात आले आहे. याप्रकरणी मयत धनराज निकुंभयांचे काका पंडित शामजी निकुंभ(रा. घुसर्डी) यांनी भडगाव पोलीस ठाण्यात दिलेल्या फिर्यादीवरून ट्रकचालक अरबाज मन्यार याच्याविरोधात विविध कलमान्वये गुन्हा दाखल करण्यात आला आहे. तपास पोलीस उपनिरीक्षक सुशील सोनवणे करत आहेत.
