जळगाव मिरर | ६ ऑगस्ट २०२६
आर्थीक फायद्याकरीता खोटे प्रेमसंबंध निर्माण केले. त्यानंतर वेळोवेळी पैसे उकळल्यानंतर पोलीसात तक्रार देण्याची धमकी देत मारहाण करण्यात आली. या छळाला कंटाळून राजेंद्र मुकुंदा तायडे (वय ३४, रा. मोहाडी, ता. जामनेर) व सपना नामक महिलेने देखील विषारी औषध प्राशन केले होते. यामध्ये उपचार सुरु असलेल्या राजेंद्र तायडे यांचा दि. ४ जुलै रोजी मृत्यू झाला. त्यांना आत्महत्येस प्रवृत्त केल्याप्रकरणी चार जणांविरुद्ध तालुका पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, जामनेर तालुक्यातील मोहाडी येथे राहणारे राजेंद्र तायडे हे एमआयडीसी कंपनीत कामाला होते. गेल्या पाच ते सहा महिन्यांपासून ते घरी येत नसल्याने त्यांची पत्नीने विचारले असता, ते उडवाउडवीची उत्तरे देत होते. त्यांच्या पत्नीने अधिक चौकशी केल्यानंतर त्यांना राजेंद्र तायडे यांचे वाघ नगर परिसरात राहणाऱ्या सपना नामक महिलेसोबत प्रेमसंबंध असल्याचे समजले. त्या महिलेकडून तायडे यांच्याकडे वारंवार पैशांची मागणी केली जात होती. दरम्यान, त्याला विरोध केल्यानंतर मुकेश, ज्योती आणि कृष्णा नामक व्यक्तींकडून त्यांना मारहाण करुन पोलिसात तक्रार देण्याची धमकी दिली जात असल्याचे राजेंद्र तायडे यांनी त्यांच्या पत्नीला सांगितल्याचे फिर्यादीत नमूद आहे.
तायडे यांच्या पत्नीने त्यांना समजविण्याचा प्रयत्न केला. मात्र त्या चौघांबद्दल त्यांच्या मनात भिती असल्यामुळे ते पत्नीच्या बोलण्याकडे दुर्लक्ष करुन मोहाडी येथून पुन्हा जळगावात सपना नामक महिलेच्या घरी राहण्यासठी आले. दरम्यान, त्यांच्या नातेवाईकांनी देखील त्यांना समजविण्याचा प्रयत्न केला, मात्र ते ऐकत नसल्याने त्यांची पत्नी माहेरी निघून गेली होती. त्यानंतर देखील त्यांनी फोनवरुन संसाराचा विचार करुन पतीला घरी येण्यासाठी विनवनी केली. मात्र ते चौघांच्या भितीमुळे घरी येण्यास नकार देत होते.
तायडे यांच्या पत्नीने जिल्हा रुग्णालयात असलेल्या मुकेश, कृष्णा व ज्योती नामक महिलेकडे विचारणा केली. परंतू ते काहीही माहिती देत नव्हते. दरम्यान, राजेंद्र तायडे यांची प्रकृती खालावल्याने खासगी रुग्णालयात हलविण्यात आले. याठिकाणी उपचार सुरु असतांना दि. ४ ऑगस्ट रोजी त्यांचा मृत्यू झाला. दरम्यान, तायडे यांची पत्नी लक्ष्मीबाई तायडे यांनी दि. ५ रोजी तालुका पोलीसात तक्रार दिली. त्यानुसार चौघांविरुद्ध आत्महत्येस प्रवृत्त केल्याप्रकरणी गुन्हा दाखल करण्यात आला आहे. तपास उपनिरीक्षक विजय पाटील हे करीत आहे.
