जळगाव मिरर । १३ ऑक्टोबर २०२६
शहरापासून नजीक असलेल्या नशिराबाद येथे दुर्गोत्सवानिमित्त उपवास केलेल्या येथील पेठ भागातील खुशी जालिंदर नाथ (वय ९) नऊ वर्षीय चिमुरडीचा दुर्दैवी मृत्यू झाल्याची हृदयद्रावक घटना १२ ऑक्टोबरला घडली. खुशीची प्रकृती अचानक खालावल्याने आई-वडिलांनी तिला उपचारार्थ रुग्णालयात नेण्यासाठी धावपळ केली. मात्र, तिला पुढील उपचारांसाठी जळगावच्या शासकीय रुग्णालयात हलवण्यात आले अन् तेथेच तिचा दुर्दैवी मृत्यू झाला.
मिळालेल्या माहितीनुसार, खुशी नाथ ही चौथीचे शिक्षण घेत होती. दरम्यान, खुशीने ११ ऑक्टोबरला दुर्गोत्सवाच्या पहिल्या दिवशी उपवास केला होता. तर, सोमवारीही तिचा उपवास होता. दरम्यान, सोमवारी सकाळी खुशीला ताप जाणवू लागल्याने आईने तिला तापाची गोळी दिली. मात्र, त्यानंतर तिची प्रकृती अधिकच खालावली. त्यामुळे कुटुंबीयांनी तिला तातडीने नशिराबाद येथील एका खासगी रुग्णालयात नेले. तेथील डॉक्टरांनी तिची प्रकृती पाहून पुढील उपचारांसाठी शासकीय रुग्णालयात नेण्याचा सल्ला दिला.
त्यानुसार खुशीला नशिराबाद प्राथमिक आरोग्य केंद्रात दाखल केले. या वेळी वैद्यकीय अधिकारी डॉ. स्नेहा कोलते उपस्थित होत्या. खुशीची प्रकृती अत्यवस्थ असल्याने तिला ऑक्सिजनची गरज होती. मात्र, प्राथमिक आरोग्य केंद्रात ऑक्सिजनची सुविधा उपलब्ध नसल्याने तिला पुढील उपचारांसाठी जळगावच्या शासकीय रुग्णालयात पाठवल्याची माहिती डॉ. कोलते यांनी दिली. तेथेच उपचारादरम्यान तिचा दुर्दैवी मृत्यू झाला. दरम्यान, उपवासाच्या पार्श्वभूमीवर खुशीची प्रकृती खालावल्याचे सांगितले जात असले, तरी तिच्या मृत्यूचे नेमके वैद्यकीय कारण अधिकृतरीत्या स्पष्ट झालेले नाही. मात्र, या घटनेमुळे ग्रामीण भागातील आरोग्य सुविधांची उपलब्धता आणि आपत्कालीन उपचारांची तयारी यावर गंभीर प्रश्न निर्माण झाले आहेत.
खुशीचे वडील मजुरी करून कुटुंबाचा उदरनिर्वाह करतात. घरातील लाडक्या मुलीच्या मृत्यूने कुटुंबीयांनी केलेला आक्रोश मन हेलावून टाकणारा होता. खुशी अतिशय गोड आणि सर्वांची लाडकी असल्याचे परिसरातील नागरिक सांगतात. तिच्या अकाली जाण्याने कुटुंबीयांसह परिसरात शोककळा पसरली आहे.
