जळगाव मिरर | ७ डिसेंबर २०२३
शिवनेरी बसमधून प्रवास करणाऱ्या महाविद्यालयीन तरुणाला शीतपेयातून गुंगीचे औषध देऊन चोरट्याने सोनसाखळी, सोन्याचे कडे व रोकड असा साडेतीन लाख रुपयांचा ऐवज लुटल्याचा प्रकार मंगळवारी दि. ५ उघडकीस आला. येरवडा पोलीस ठाण्याकडून हा गुन्हा खोपोली पोलिसांकडे तपासासाठी वर्ग करण्यात आला आहे.
मिळालेल्या माहितीनुसार, एका तरुणाने येरवडा पोलीस ठाण्यात फिर्याद नोंदवली आहे. हा तरुण येरवडा भागातील एका उच्चभ्रू सोसायटीत राहायला असून, बी. टेक. फूड सायन्स अॅण्ड टेक्नॉलॉजीचा अभ्यासक्रम शिकतो आहे. तो शनिवारी (दि. २) नवी मुंबईतील बेलापूर येथे परीक्षा देण्यासाठी गेला होता. परीक्षा संपल्यानंतर तो सायंकाळी सहाच्या सुमारास शिवनेरी बसमधून पुण्याकडे निघाला. मुंबई-पुणे द्रुतगती मार्गावरील खोपोली फूड प्लाझा येथे सायंकाळी सातच्या सुमारास बस थांबली. प्रवाशांनी तेथे चहा, नाश्ता केला. यानंतर बसमध्ये बसलेल्या चोरट्याने तरुणाशी ओळख केली. त्याला शीतपेय पिण्याचा आग्रह केला.
शीतपेय प्याल्यानंतर तरुण बेशुद्ध पडला. त्यानंतर, चोरट्याने त्याच्याकडील सोनसाखळी, सोन्याचे कडे व पाकीट असा ऐवज लांबविला. पाकिटात आधारकार्ड, डेबिट कार्ड होते. शिवनेरी बस पुणे स्टेशन परिसरात थांबली. त्या वेळी तरुण बेशुद्धावस्थेत आसनावर पडल्याचे वाहकाने पाहिले. तरुणाला त्याने जागे केले. तरुण बसमधून उतरला. तरुण गुंगीत असल्याचे पाहून रिक्षाचालकाने त्याच्याकडे विचारणा केली. त्याने या तरुणाला घरापर्यंत सोडले. त्याची अवस्था पाहून वडिलांनी त्याला थेट खासगी रुग्णालयात दाखल केले. तेथील उपाचारानंतर तरुणाने येरवडा पोलीस ठाण्यात फिर्याद नोंदवली. खोपोली परिसरात गुन्हा घडल्याने येरवडा पोलिसांनी संबंधित गुन्हा तपासासाठी खोपोली पोलीस ठाण्याकडे सोपवला आहे.