जळगाव मिरर | ८ मे २०२६
यावल तालुक्यातील चुंचाळे येथे गावातील विहिरीजवळ खेळत असताना पाय घसरून १६ वर्षीय मुलगा पाण्यात बुडाल्याची दुर्दैवी घटना बुधवारी सायंकाळी घडली. रात्री उशिरापर्यंत सुरू असलेल्या शोधमोहिमेनंतर मुलाचा मृतदेह विहिरीतून बाहेर काढण्यात आला. या घटनेमुळे परिसरात हळहळ व्यक्त होत आहे. याप्रकरणी यावल पोलिस ठाण्यात अकस्मात मृत्यूची नोंद करण्यात आली आहे.
मिळालेल्या माहितीनुसार, चुंचाळे येथील न्याजोद्दीन तडवी (वय १६) हा गावातील विहिरीजवळ मित्रांसोबत खेळत होता. खेळत असताना अचानक त्याचा पाय घसरला आणि तो थेट विहिरीत कोसळला. ही घटना लक्षात येताच परिसरातील नागरिकांनी तत्काळ धाव घेतली. मात्र विहिरीत पाण्याची खोली अधिक असल्याने मुलाचा शोध घेण्यात अडचणी येत होत्या.
घटनेची माहिती मिळताच ग्रामस्थांनी शोधमोहीम सुरू केली. तसेच विहिरीत शोध घेण्यासाठी डांभुर्णी येथील पट्टीचे पोहणारे बोलावण्यात आले. अनेक तासांच्या प्रयत्नांनंतर रात्री उशिरा न्याजोद्दीन याला विहिरीतून बाहेर काढण्यात आले आणि तातडीने यावल ग्रामीण रुग्णालयात दाखल करण्यात आले. मात्र डॉक्टरांनी तपासणीअंती त्याला मृत घोषित केले. यानंतर ग्रामीण रुग्णालयात शवविच्छेदनाची प्रक्रिया पूर्ण करण्यात आली. शवविच्छेदनानंतर मृतदेह कुटुंबीयांच्या ताब्यात देण्यात आला. या दुर्दैवी घटनेमुळे चुंचाळे गावावर शोककळा पसरली असून, गावकऱ्यांकडून हळहळ व्यक्त केली जात आहे. या प्रकरणाचा पुढील तपास पोलीस निरीक्षक रंगनाथ धारबळे यांच्या मार्गदर्शनाखाली हवालदार संदिप सूर्यवंशी करीत आहेत।
