जळगाव मिरर | ६ एप्रिल २०२६
भुसावळ शहरात अल्पवयीन मुलगी बेपत्ता झाल्याच्या घटनेनंतर बाजारपेठ पोलिसांनी तातडीने कारवाई करत मुलीसह संशयित आरोपीला ताब्यात घेत मोठे यश मिळवले आहे. पीडित मुलीच्या जबाबावरून आरोपीविरुद्ध अपहरण व अत्याचाराचा गंभीर गुन्हा दाखल करण्यात आला असून न्यायालयाने त्याला पोलिस कोठडी सुनावली आहे.
या प्रकरणातील आरोपी अमोल किसनराव निंदाणे (वय २८) याने अल्पवयीन मुलीला फूस लावून पळवून नेल्याचा आरोप आहे. त्यानंतर तिच्यावर अत्याचार केल्याचेही मुलीने आपल्या जबाबात नमूद केले आहे. या गंभीर प्रकरणाचा तपास विभागीय पोलिस अधिकारी केदार बारबोले आणि पोलिस निरीक्षक राहुल वाघ यांच्या मार्गदर्शनाखाली सुरू होता.
बाजारपेठ पोलीस ठाण्याच्या गुन्हे प्रकटीकरण शाखेच्या पथकाने विशेष शोधमोहीम राबवत मुलीचा ठावठिकाणा शोधून काढला आणि तिला सुरक्षित ताब्यात घेतले. त्यानंतर पोलिसांनी तत्काळ कारवाई करत आरोपी अमोल निंदाणे याला अटक केली. न्यायालयात हजर केले असता त्याला ६ एप्रिलपर्यंत पोलिस कोठडी सुनावण्यात आली आहे.
दरम्यान, रावेर तालुक्यातील अशाच प्रकारच्या दुसऱ्या प्रकरणातही पोलिसांनी कारवाई करत शुभम अनिल पाटील (वय २१, रा. खिरोदा) याला अटक केली आहे. या प्रकरणात १५ वर्षीय मुलीला फूस लावून पळवून नेल्याची तक्रार २८ मार्च रोजी दाखल करण्यात आली होती.
तपासादरम्यान पोलिसांनी आरोपीचा माग काढत त्याला मध्य प्रदेशातील भिकनगाव येथून ताब्यात घेतले. त्यानंतर त्याला रावेर येथे आणण्यात आले व ४ एप्रिल रोजी अटक करण्यात आली. या प्रकरणी विशेष पोक्सो न्यायालयाने आरोपीला पोलिस कोठडी सुनावली आहे. या दोन्ही घटनांमुळे परिसरात खळबळ उडाली असून अल्पवयीन मुलींच्या सुरक्षेबाबत प्रश्नचिन्ह निर्माण झाले आहे. पोलिसांकडून दोन्ही प्रकरणांचा पुढील तपास सुरू आहे.
